I kong Isawanda Laloo, IAS iba dei i Electoral Roll Observer mynta ka sngi ila wan sha nongbah Jowai ban pynlong ia ka jingiakynduh bad ki ophisar ka tnat Election kumjuh ruh ia ki nongmihkhmat jong ki kynhun political party ha ka jingiadei bad ka jingiaid beit iaid ryntih ka rukom pynbit pynbiang ia ki electoral roll kiba iadei naduh ka rukom pynrung kyrteng, ka jingpynbeit kyrteng ne ka jingkynriah jaka bad kiwei de hapoh ka West Jaintia Hills District.
Mynta ka sngi i kong Isawada ila ioh ban pynlong ia ka jingialang bad ki Electoral Registration Officer (EROs), ki Assistant Electoral Registration Officer (AEROs) jong ki san tylli ki Assembly constituencies kiba kynthup iaka1-Nartiang, 2-Jowai, 3- Raliang, 4-Mowkaiaw bad 7-Amlarem Assembly Counstituencies hapoh ka kamra treikam jong u Deputy Commissioner, West Jaintia Hills District, Jowai.
I kong Laloo i la pynlong sa ia ka jingiakynduh lang bad ki nongmihkhmat jong ki political party bapher bapher ha kaba ki la ioh ban ia kren ne phylliew jingmut iaka rukom iaid beit iaid ryntih ka Electoral Roll hapoh ka District. I kong Laloo i la kyntu ruh iaki nongmihkhmat jong ki Political Parties ba kin buh ne thung ia ki Booth Level Agents, na ka bynta ban kham suk shuh shuh ka rukom trei kam hapdeng ka ophis jong ka Election bad ki Political Parties.
Ha kane ka juh ka sngi i kong Laloo ila pynllait paidbah ruh ia ka video lyngkot shaphang ka SVEEP (Systematic Voter’s Education and Electoral Participation) kaba iadei bad ka Special Summary Revision (SSR) ia kaba la pynbit pynbiang da ka kynhun “CHI IUNG”.