U Myntri Rangbah jong ka Jylla u Conrad K Sangma mynta ka sngi ula hiar sha ka shnong Raliang na ka bynta ban plie paidbah ia ka Greater Raliang Water Supply Scheme bad ia ka jaka shongkai pyngngad bad ruh ban buh maw nongrim ia ka jingthmu ban tei noh ia ka ophis treikam jong ka Fire & Emergency Service Station ha Raliang.
Ha kane ka sngi la iadonlang ruh u MLA ka thaiñ u ma Comingone Ymbon, u ma Sniawbhalang Dhar, u Addl.Deputy Commissioner ka West Jaintia Hills District u bah Prafulla K Boro MCS, u SP ka West Jaintia Hills u B. D Marak, bad ki heh sorkar na ki tnat treikam bapher bapher. La iadonlang ruh ki nongialam shnong kynthup ia u Daloi ka Elaka Raliang u ma C. Lyngdoh bad ki riewpawkhmat jong ka thaiñ.
Ha kane ka juh ka sngi na ka liang jong u Myntri Rangbah ula ioh lad ruh ban sam ia ki skhim jingiarap lyngba ka FOCUS+ kaba kot Rs.2.07 Lak sha ki 207 tylli ki Producer Group, ka skhim YESS &NRLM CIF kaba kot Rs.5.40 Lak ba la sam sha ki 13 tylli ki Youth Group.
U Myntri Rangbah u la sam ruh ia ki 1068 tylli ki symbai sniang sha ki 267 ngut ki nongioh jingmyntoi bad la sam ruh ia ki symbai syiar (Kuroiler) sha ki 50 ngut nongioh bynta jong kane ka thaiñ kaba la pyntreikam lyngba ka skhim PROGRESS.
