Pynkut burom ka ASSA ïaki Youth Teams haka kyrdan U-14 bad U-16
U President ka Meghalaya Football Association (MFA) bah Hamletson Dohling mynta ka sngi saitjaiñ 2 taraik u Naiwieng ula wan ban plie pyrda ïa ka lynpung ïalehkai jong ka Amlarem Football League 2024-2025 kum u kongsan haka jingïalang ba la pynlong ha madan Mini Stadium ASSA, Ladjaplem, ïa kane ka lympung la pynïaid da ka Amlarem Sub-Divisional Sports Association (ASSA), West Jaiñtia Hills District.
Ha kane ka sngi la wan ban donlang da ki dkhot ka MFA kynthup ïa u General Secretary bah Sunesh Syiem, bah Heringson Shangpliang, u bah Cliff Nongrum, bah Freddy Kharpran, rangkat u Extra Assistant Commissioner ka Amlarem Sub-Division bah G. Mylliem lem bad ki dkhot ka ASSA, katba ïa ka jingïalang la pynïaid da u Working President ASSA ma Wansuk Lamin.
Ha kane ka Amlarem Football League 2024-2025 ki jingïalehkai ki kynthup ha ki lai tylli ki kyrdan kata ka ‘Super Division’ kiba la don 8 tylli ki kynhun, ha ka ‘Upper Division’ ki don 16 tylli ki kynhun bad ha ka ‘Lower Division’ ki don 45 tylli baroh ki kynhun jong kine ki lai kyrdan ki don 69 tylli ïa kiba yn pynïakhun lang hapoh kane ka samoi ïalehkai jong ka Amlarem Football League 2024-2025.
Na ka liang ka Amlarem Sub-Divisional Sports Association kala pynkup burom kumjuh ïa ka Youth Teams haka kyrdan Under-14 bad Under-16 (ASSA) kiba la ïoh ban ïalehkai ha ka State Youth League 2024 kaba la dep pynlong ha Nongbha Shillong.
Haba phai sha ka jingïakhun ba nyngkong mynta ka sngi haka kyrdan Super Division, hapdeng ka Pamtbuh SC pyrshah ïaka Lumpyngngad SC ka kynhuh ïaleikai jong ka Lumpyngngad SC kala lah ban pynliem da 4-0 kol ïa ka Pamtbuh SC, ïa ki kol na ka Lumpyngngad SC la thep da u Dei-o-syih ha ka minit ba 15 & 52, u Dongmih Surong haka minit ba 56 bad u B. Pohshna haka minit ba 60.
U President ka Meghalaya Football Association bah Hamletson Dohling haba ai jingkren hashwa ban sdang jong ka jingïalehkai Super Division ula ai ka jingkitbok kitrwaing ïa ki nongkitkam jong ka Amlarem Sub-Divisional Sports Association (ASSA) kiba la lah ban pynïaid shakhmat ïa kane ka lympung ïalehkai hapoh ka thaiñ Amlarem Sub-Division.
Ula ong ruh kiba bun na ki rangïalehkai jong ka jylla ki dei kiba la pynmih napoh kane ka thaiñ War Jaiñtia, kumta ki kyntu jur ïa ki rangïalehkai ba kin long kiba treishitom, khnang ba kin lah ban pynpaw pyrthei ïala ka sap ka phong kaba ki don.
Ha ka juh ka por ula pyntip ïa ka jingsiang ïa u ‘Artificial Turf’ ha kane ka madan ïalehkai Mini Stadium ASSA, Ladjaplem kan sdang noh ha kine ki kyndiat sngi kata naduh ka 15 tarik jong une u bnai Naiwieng bad u kyrmen ba kan long ka madan ïalehkai kaba biang eh hadien bala dei siang ïa u Artificial Turf.
