Mynta ka sngi u Myntri ka sorkar jylla ba dei peit ia ka Law, Health & Family Welfare u James K. Sangma ula wan ban plie ia ka ïing Bishar thymmai ne ka District Council Court jong ka Jaintia Hills Autonomous District Council (JHADC).
Haba kren ha kane ka sngi u James ula ong ba ka jingplie ia kane ka Court thymmai jong ka Council kan iarap shibun ban pynkloi ia ka jingbishar ia kino kino ki mukotduma. Ula ong ruh ba katkum ka Sixth Schedule ki District Council Court (DCC) ki don la ka jong ka hok treikam kumba la kdew ha ka Riti Synshahr ka Ri India katkum ka Article 244.
U la ong shuh shuh ba ka Sixth Schedule ka la long kum kawei na ki Constitution kaba rit hapoh ka Constitution jong ka ri India bad lyngba kane ka ailad ia ki paid riewlum jong ka thaiñ shatei lam mihngi ka ri India ba kin im bad synshar katkum ka riti dustur jong ki, khlem da shah pynbor ban bud ia kiei kiba long pyrshah ia ka jinglong tynrai jong ki.
La ioh ruh ka jingkren na u ma Phasmon Dkhar (EM) ba dei peit ia ka CWD jong ka Council uba la ai ia ki kyntien pdiang ia baroh bad ula ong ba kane ka dei ka sngi sah kynmaw na ka bynta ki paid nong Jaintia namar ba ki la lah ban ioh ia ka ïing District Council Court kaba pura. Ula ong ba wat la ka shim por slem ban pyndep ia kane ka ïing Bishar hynrei ka long pat ka jingkmen kaba khraw mynta ka sngi bala lah ban plie pyrda ia ka.
Na ka liang u CEM ma Thombor Shiwt ula ong ba hapoh jong ka Sixth Schedule, ka District Council ka don lai tylli ki bynta ba kynthup ia ka District Council Court, ka Additional District Council Court bad ka Subordinate District Council Court kaba kynthup ruh ia ka Village Court kiba iaid katkum ka riti dustur jong ki nongshong shnong. Ula pynpaw ka jingiaroh ia ka sorkar Pdeng (Government of India) kaba la iarap pynioh pisa lyngba ka 13th Finance Commission na ka bynta ban tei ia kane ka DCC ha nongbah Jowai bad ka Village Court jong ki 19 Elaka.
U MLA jong ka Jowai u ma Wailadmiki Shylla bad u Deputy Commissioner ma Garod LSN Dykes ruh kila ai jingkren ha kane ka sngi.
Ha kane ka sngi la iadon lang ki MDC ka JHADC, ki Dalloi na ki Elaka bapher bapher, ki dkhot jong ka West Jaiñtia Hills Bar Association, East Jaiñtia Hills Bar Association bad kiwei de ki kynrem ki lyndan bala shah khot sngewbha.
