U Myntri Rangbah duh ka sorkar jylla u Conrad. K. Sangma mynta ka sngi 21 tarik u Naiwieng, ula wan ban plie pyrda ïa u mawnongrim ka Namdong C&RD Block kaba la sah teng ka jingdawa naduh ka snem 2007
Ha kane ka sngi la wan ban don ryngkat naduh u myntri ka kam jngohkai u ma Sniawbhalang Dhar, u MLA ka 2-Jowai ma Wailadmiki Shylla, u CEM ka JHADC ma Thombor Shiwat, Director C&RD Department Shillong u Sibhi Chakravarthy Sadhu IAS nalor kiwei de ki ophisar bad ki paidbah nongshong shnong.
Ha kane ka juh ka sngi u Myntri Rangbah ula ïoh ruh ban plie sa lai tylli ki mawnongrim kawei ban kyntiew kyrdan ïa ka Namdong PHC sha CHC, ka Greater Mukhnang Lumrot Water Supply Scheme kaba la kot haduh T.46.12.26.350/- hapoh ka JJM, ka surok Jowai Nartiang Kdiap Khanduli Road (JNKK) ha kaba yn sdang ban khot tender ha u bnai Noprah mynta ka snem ïa kaba yn pyntrei da ka tnad Public Works Department (Roads) uba don haduh 59.955 km hapoh ka NDB 2000-23 ha ka jinglut kaba 40 klur bad la khap ruh ïa ar tylli ki kali kit nongpang ha kane ka jingïalang ba la pynlong ha Madan Sari Namdong-B West Jaiñtia Hills.
Na ka liang u Waheh Shnong ka Namdong-B ula pynpaw ka jingsngewnguh ïa u MLA ka thaiñ ula wanrah ïa kane ka Block kala la rim bha haka jingdawa naduh ki nongïalam shnong bad ki kynhun seng Bhalang kaba la urlong mynta ka sngi.
La pynshong shit shuh shuh ïa kane ka sngi da ka jingshad bad ki jingrwai daki nongshong shnong ka Namdong-B, ïa ki kyntien ai pdiang la ïoh na u Deputy Commissioner ka WJHD bah B.S Sohliya, katba ia ki kyntien ai khublei la ioh na u Project Director u P.K Boro, ha kane ka sngi la sma ruh ïa ki khun sniang bad ki syiar sha ki nongrep ka thaiñ.
