Ia ka jingrakhe Republic Day ba 77 la iashim bynta lang ha Jowai ha kaba la pynlong ia ka jinglehkmen ha Madan Jrisalein, Chutwakhu, Jowai bad u ma Kyrmen Shylla MLA bad ba ju long u myntri ka Sorkar Jylla ula wan ban pynher ia ka lama lai rong ka ri bad ruh ban shim ia ka Rashtriya salute na ki 17 tylli ki kynhun ba ialeh March Past.
Ki kynthun kiba iashim bynta ha ka March Past ki kynthup ia ka District Police, Kiang Nangbah Govt. College NCC Unit, Jowai, ka Thomas Jones Synod College NCC, ka Government Girls Higher Secondary School, Jowai NCC Contingent, ka Meghalaya Bharat Scout and Guides, Jowai bad 12 tylli ki skul.
Ka jingrakhe ka la iaid ruh ryngkat ka jingpyni ia ki Tableau na ki Department bapher bapher kiba pyni ia ka jingjop ha ka jingtreikam jong ki.
Ha ka jingiaid March Past ka PM Shri School JNV Mukhla kala ioh ia ka nam ba nyngkong, ka Government Boys Higher Secondary School, Jowai ia ka nam ka ba ar bad ka Tome Memorial Higher Secondary School, Mooralong, Jowai kala ioh ia ka nam ba lai.
Ki don haduh 13 tylli ki tnad sorkar kiba la wanrah ia ki Tableau jong ki. Na kine ka District Commerce and Industries Centre (DCIC), WJHD Jowai kala wan ba nyngkong, ka District Prison and Correctional Home, WJHD, Jowai kala wan ba-ar bad ka Meghalaya State Skill Development Society, WJHD, Jowai kala wan ba-lai.
Ha kane ka jingrakhe la ai khusnam ruh ia ki nongtrei ASHA bad ANM ban burom halor ka jingtrei shitom jong ki ha ka World Population Fortnight 2025. Ka kong Rijoy Lapasam, ANM na Mowkaiaw Sub-Centre ka la ioh ia ka khusnam. Ka kong Lama Muroh, ASHA na Khliehtyrshi NSC ruh kala ioh ia kane ka khusnam
Ban pynphuh pynphieng ia kane ka jingrakhe kila don ki jingrwai, ki jingshad, ka jingpynher iaki dingkum da ka Dorbar Shnong Chilliang Raij. Kala don ruh ka jingleit ai sngewbha da ki jingbam sha ki jaka ri khunswet da ki kynhun treimon sngewbha.
Ha Hima Shangpung ruh la rakhe ia ka 77th Republic Day, ha madan Hula, Moosyiem, Shangpung ha kaba ka kong Santa Mary Shyll, MLA kala shim ia ka bynta ban pynher ia ka lama ka ri bad shim ia ka salute na ki 9 tylli ki kynhun March Past.
Ka la don ka jingswam ia ki khusnam sha ki nongjop, ha kaba ka Sein Raij Upper Primary School, Khliehrangnah kala wan ba nyngkong, ka Dolini Chullet Memorial Secondary School kala wan ba ar bad ka Lummuro Higher Secondary School kala wan ba lai.
Kila don kiwei de ki prokram kiba pynsngewtynnad ia kane ka jingrakhe, lyngba ki jingrwai ieit ri, ki rwai bad ki shad tynrai ba la shim bynta da ki khynnah skul.
