Mynta ka sngi (16/10/2021) ka President jong ka Meghalaya Pradesh Mahila Congress Committee (MPMCC) ka kong Joplin Scott Shylla ka la hiar sha ka shnong Ladrymbai na ka bynta ban pynskhem ia ka Ladrymbai Mahila Congress Unit kaba la pynkha da ka East Jaintia Hills Mahila Congress Committee mynta ka sngi ha shnong Ladrymbai.
Ka kong Joplin ha ba kren ha ka jingialang kaba la pynlong ha Ladrymbai Conference Hall ka la ong ba ka Party Congress ka dei kaba ailad ia ki kup shiliang ki sem shiliang ban iashim bynta ha kino kino ki kam jong ka Party. Ka Congress ka dei ruh ka party kaba burom ia ki niam bapher bapher, kynthup ia ki niam tynrai bad ia ki riti ki dustur (Culture) baroh. Ka la ai ruh ia ki kyntien sneng kyntien kraw ia ki nongkitkam baroh jong ka Ladrymbai Mahila Congress Unit ba ki dei ban long kum ki atiar kiba khlaiñ ban ialeh pyrshah ia ka jingshah iuhroit ka hok jong kiba duk ba shitom bad ka kitbok kit rwiang ruh ba kane ka Ladrymbai Mahila Unit ba kan nang kiew shaphrang.
Kiwei de kiba ai jingkren ki kynthup ia ka kong Daman Swer kaba dei ka Treasurer ka East Jaintia Mahila Congress Committee, na u ma Khimbha Phawa President ka Wapung Skur Unit. Baroh ki nongkren ki pynpaw bad ki don ka jingkhmih lynti ba ha u snem 2023 ka Party Congress kan ioh biang ia ka bor synshar hapoh ka jylla bad kan wanrah ruh ia ki jingkylla hapoh ka jylla hi baroh kawei. Kila pynpaw ba kumba long mynta kane ka sorkar MDA ka long ka sorkar kaba tlot tam ha baroh ki liang.
Ia ka jingialang la pyniaid da ka President jong ka East Jaintia Hills Mahila Congress Committee kong Jhanika Siangshai.
Kiwei de kiba la iadonlang ha kane ka jingpynkha Unit ki kynthup ia i Secretary Meghalaya Pradesh Mahila Congress Committee kong Jacinla Mawlong , i Working President Thanda Sana, B.siangshai President 7 shnong circle, Secretary Enry Lamurong, Tyrshain Siangshai, President Pamrakmai Ioki Dkhar bad kiwei ki riew rangbah.
Ki nong kit kam jong kane ka Ladrymbai Mahila Congress Unit ki long President-Gracebedel Rymbai, Vice President-Gita Sana, General Secretary-Pretty Jyrwa, Assistant Secretary- Banrishisha Mukhim bad la jied ruh 25 ngut ki Executive Members.
