Mynta ka sngi Ki paidbah na ka 1-Nartiang Assemble Constituency kiba la don da ki phew hajar ngut kila wan poi sha ka jingpynskhem nongkitkam ka 1-Nartiang National People Party (NPP) LA Constituency Block Committee kaba dei ka Constituency u ma Sniawbhalang Dhar ïa kaba la pynlong ha Ïewpynsin Wahiajer, West Jaiñtia Hills District.
La pynsngew da kiba bun na ki nongkren ha kane ka sngi ba kim pat ju sakhi kum kane ka jingïalang Election kaba dei ruh ka sien kaba nyngkong jong kane ka snem ba ki paidbah kin wan da ki hajar ban ai jingkyrshan ban pyndap lut ïa katei ka jaka ba pynlong jingïalang naduh ki bynta jong ka Iawpynsiñ bad shaduh ki bynta ka surok bah.
U ma Sniawbhalang Dhar haba ai jingkren ha kane ka sngi ula pynsngew ïa ki kam pynroi kiba la wanrah hapoh ka Constituency kiba ïadei naduh ka jingpynbha ïa ki surok, ki lynti syngkieng kiba la dep pyntrei, shuh shuh ki dang don ruh kiba dang pyntrei bad kumjuh ïa kiba la dep ban mang pisa (Sanction), kumjuh ïa ka Stadium hapoh ka shnong Wahiajer kaba long katkum ka International Standard kaba duna ïa ka 40 klur tyngka, ïa kane yn sa plie noh ha u bnai March jong ka snem 2023 bad kiwei de. Ula pynbna ba un plie paidbah ïa ka C&RD Block ba thymmai ha shnong Namdong ha kane ka 21 tarik mynta u bnai.
‘Tang kane ka sorkar kala la wanrah jingmyntoi ïa ki nongrep lyngba ka jingpyllait ïa ka pisa kaba la tip kum ka FOCUS, kane ka sorkar kala pynkiew ïa ki Self Help Groups na 4 hajar tam sha ka 45 hajar ki Self Help Groups. Ha kaba ïadei bad ka jingïoh ïarap ki paidbah ha ka pang ka shitom lyngba ka MHIS la pynkiew noh sha ka 5 lak tam tyngka. Hynrei kiba pyrshah ïa kane ka sorkar ki don manla ka sngi katba kiba pynïasoh sha ka NPP ki don manla ka kynta, ong shuh shuh u ma Sniawbha.
Kum u nongmihkhmat ka 1-Nartiang Constituency lada u wan biang ha ka jingjop un sa long u nongsam Minister bad kane long ka jingmyntoi kaba khraw ba ka Constituency kaba long kum ka jingïoh nong kumba thied jaiñ na ïew (by one get 3 free) namar haduh 4, 5 ngut ki MLA ki long na ka juh ka longïing.
Haba pynkut ia ka jingkren u kyntu ban wanrah ïa ka roi ka par ha ki liang baroh, u ong dei ban don ‘ka jingïatylli kaba long ka bor, ka jingïaishah ka long jingjop bad ka jingiohi jngai kaba wanrah ka jingphuh jingphieng’ ha synshar khadar.
kiwei de kiba ai jingkren ki long u Waheh Shnong ka Namdong-B ma Damian War, u Briwon Pohshna na Ummulong, u CEM ka JHADC ma Thombor Shiwat, MDC ma Jesse Suiam, bah Bajop Pyngrope nongaiktien ka NPYF, u MLA ka Jowai uba dei ruh u President ka NPP West Jaintia Hills ma Wailadmiki Shylla uba la pynskhem ia ki nongkitkam ka Nartiang Block Committee, u MLA ka Mawhati uba dei ruh u myntri sorkar ma Dasakhiat Lamare, ma Ngaitlang Dhar katba ïa ka jingïalang la pynïaid da u ma Hamkom Khynriam President NPP Nartiang.
La pynphuh pynphieng shuh shuh ïa kane ka jingïalang da ka jingshadpliang na ka Wahiajer, na Ummulong, jingrwai na Mynsngat bad na ki nongshong ïew Namdong-Khanduli.
