Ka EJNC (East Jaintia National Council) kala ioh ban rakhe ia ka lyngkhuh dap 7 snem jong ka jingshakri jong ka ia ka ri bad ka jaidbynriew naduh bala seng ia ka ha ka 10 tarik u July 2015.
Ia ka prokram jinglehkmen la pynlong hynnin ka sngi Saitjaiñ namar ba ka 10 tarik ka hap ha sngi Sunday. Ha kane ka sngi ki Dkhot bad ki nongialam jong ka EJNC na kylleng ka Rilum Jaiñtia kila wan ban ia shim bynta sha ka Prokram bala khreh da ka EJNC – CEC, ha Khliehriat West Community Hall, kum shibynta ban rakhe burom ia kane ka sngi bala shuit la shor ia ka EJNC.
La pyniaid ia kane ka Prokram da u Bah Damonmi Dkhar, Chief Advisor EJNC – CEC, shuh shuh lah pynbyrñia ia kane ka prokram daka jingshad tynrai na ki khun samla ka Shnong Tuber & Jalaphet bad ka jingrwai na ka EJNC – Khliehriat Unit.
Ha kane ka sngi la wan ban sakhi lang da u Ma Kyrmen Shylla MLA ka thaiñ bad ruh u Minister ka Social Welfare & Disaster Management, MDA Government, la iadonlang ruh u Samla Jersom Shylla, President Rangbah ka Jaiñtia Students Union (JSU), Bah Lening Rymbai, President Rangbah ka Jaiñtia Students Movement (JSM), Bah Dame Rymbai President barim ka JYF, Bah Moses Swer, u Samla rangbah ba pawkhmat jong ka shnong Khliehriat East bad kiwei kiwei.
Haba kren ha katei ka sngi na ka liang u Bah Sambormi Lyngdoh President Rangbah ka EJNC u la pynpaw iaka jing sngewdiaw halor ka jingsahdien bad ka jingshah ieh khun shwet jong ka East Jaiñtia Hills District ha ki ba bun ki liang naduh ka jingsniew jong ki Surok shaki thaiñ nongkyndong ka ba la buh ia ki paitbah ha ka jingeh kaba khraw khamtam haka por lyiur, ka jing duna jong ki Government School bad Government College shuh shuh u la pynpaw ba ka EJNC ka kyrshan pura ia ka jingdawa jong ka JSM ia ka Government College hapoh East Jaiñtia Hills District, u ne u nongialam ba Rangbah jong ka EJNC ula pynpaw ruh iaka jingsngewsih ban iohi iaka jingshah kñieh jong ka kamai kajih jong ki trai Ri trai muluk ha ki briew kiba nabar Jylla, ka jingkyrduh kam kyrduh jam jong ki khun samla ka District bad ka jingtlot jong ka JHADC ban tehlakam ia ki jing khaïi be-aiñ jong ki barjylla.
