U Symbud Myntri Rangbah ka jylla u ma Sniawbhalang Dhar u la wan ban sakhi lang ia ka sngi pynkut ia ka shad Behdeiñkhlam jong ka Seiñ Raij Jowai kaba la pynlong mynta ka sngi ha Syiem Aitnar.
Ha kane ka sngi da ki hajar ki riew paitbah na kylleng ki bynta jong ka Jylla bad nabar ki la wan ban sakhi lang ia ka sngi pynkut jong ka shad Behdeiñkhlam ka Raij Jowai.
Ki khun jong ka Seiñ Raij ba kynthup na ka Kmai Raij bad Khon Raij kila wan rah ia ki rong ki rup ba kynthup ia ki Rot kiba don la ki jong ki jong ki jingmut kiba ia dei bad ka jingsneng jingkyntu ia ka imlang sahlang. Ki khun ka Seiñ Raij kiba na Shillong ruh kila wan rah lang ia ki Rot jong ki sha Aitnar.
Kiwei de ki nongmihkhmat paitbah kiba la wan ban sakhi ha kane ka sngi ki kynthup ia u Dr. W R Kharlukhi ,MP Rajya Sabha, ka Dr. Ampareen Lyngdoh, u bah Sanbor Shulai, u ma Wailadmiki Shylla, u ma Kyrmen Shylla, u DC bad u SP ka West Jaiñtia Hills, nalor ki wei de ki nongshahkhot sngewbha, kynthup ia ki nongialam jong ka Seiñ Raij Jowai naduh u President ma H. Toi, Secretary ma A. Sumer, u Dolloi ka Jowai ma Puramon Kynjing, ki dkhot bad ki riew rangbah.
