Ka madan Madiah Kmai Blai mynta ka sngi 30 tarik u Nohprah sa shisien kala shongshit biang ha kaba ki paidbah ryngkat ki dkhot jong ka Kiang Nangbah Iasiat Khnam Memorial Society, Jowai (KNIKMS), ki bor pyniaid District ka West Jaiñtia Hills ryngkat ki heh sorkar kila wan ban rakhe ïa ka lyngkhuh sngi ïap ba 159 snem jong u Khlawait ka Ri-Lum Jaiñtia u Kiang Nangbah.
Mynta u snem la rakhe kham kyrpang ïa kane ka sngi sngi ïap u Kiang Nangbah namar ka ïahap ruh bad ka jingrakhe dap 75 snem ka jingïoh laidluid jong ka Ri ne ka ‘Azadi ka Amrit Mahotsav’ bad ruh ka jingdap 50 snem ka jingïoh ïa ka jylla ba pura.
Mynta ka sngi ïa ka jingïalang la pynïaid da u Deputy Commissioner West Jaiñtia Hills District bah Garod L.S.N. Dykes, IAS, ha ka jingïadon lang u kongsan myntri ka sorkar jylla ba peit ïa ka Revenue, Disaster Management, Social Welfare Department, Excise u ma Kyrmen Shylla (MLA), u symbud kongsan ma Saron Paswet MDC 19-Jowai South Constituency, Jowai, u Dolloi ka Elaka Nongbah ma R. M. Garod, la ïoh ruh ka jingnguhblei na u ma D. Sumer, Asst. General Secretary bad ka jingkren pdiang na u ma P. Toi President ka KNIKMS.
U ma Kyrmen Shylla haba ai jingkren kum u kongsan ula pynsngew ïa ki ‘kyntien kiba u Kiang Nangbah ula khlei khadduh hashwa ba un shah sdien pasi ha ki shipai phareng’, ula ong ba ka jingïoh ban rakhe ïa kane ka sngi dap 159 snem u khlawait ka Ri ka dei lyngba ka jingïalam ba stad jong ki Waheh Wasan jong ka KNIKMS bad ki dkhot ba mynta kiba la shim khia ban leh burom ïa kane ka sngi ha manla u snem.
U ma Kyrmen ula ong ba u Kiang Nangbah ula ïeng ïaleh pyrshah bad ka sorkar phareng kaba la sdang naduh u snem 1774 bad kane ka jingïaleh hapoh ka jingïalam u Kiang Nangbah la khot ïa ka kum ka ‘Little War’ ne ka tham barit haduh ba ka pynlong ïa ka sorkar phareng ban pynhiar ïa ki shipai jong ka ïakhun ïa ka kynhun ïaleh u Kiang Nangbah. Ula pynkynmaw ba ka jingïoh shynshar ka sorkar phareng ha kato ka por buh jingeh ïa ki paid riewlum ba ki la hap ban siew ïa ka khajna kaba heh, kumjuh ka jingshah khang ban leit thang briew katkum ka jingngeit bad ka jingshah khang ïa ki kam leh ñiam leh rukom da ka sorkar phareng ha kato ka por.
Hynrei ka jingïeng ïaleh jong u Kiang Nangbah bad kiwei de ki Khlawait ka Ri India la ïoh ïa ka jingïoh laidluit kaba pura, ha ka juh ka por u buh ka jingkyntu ïa ki para doh para snam ba kin don ka jingïasngewthuh jingmut lang kawei da kaba bud nuksa ïa ki diengjat jong u Kiang Nangbah.
Na ka liang u kongsan ula leit ban buh ïa u syntiew ha trai jong u mot u Kiang Nangbah ha Syntu Ksiar bad pynher ïa ka lama jong ka Kiang Nangbah Iasiat Khnam Memorial Society. Kiwei de kila wan ban buh syntiew ki kynthup lang ïa ki seng bhalang bapher bapher jong ka Ri-lum Jaiñtia.
Na ka liang u kongsan ula sam ruh ïa ki khusnam sha ki nongjop ha ka jingïasiat khnam ha ki kyrdan kiba don ha ka rta kaba 18 snem shapoh Single bad Double, kiba 18 snem shaneng bad kumjuh ha ka jingïakop dor dur ba la pynïaid da ka KNIKMS.
