Ka lympung Ki Khynnah Seng Khasi Seiñ Raij ha ryngkat ka Seiñ Raij Mukhap mynta ka sngi 16 tarik kala pynlong ïa ka aiom lehkmen ki hep barit kaba 16 (Khadhynriew) ha shnong Mukhap, Laskeiñ pyllun West Jaiñtia Hills District halor ka phang kaba ong “Ha la thymmei ban tei ïa ka lawei”.
Ïa kane ka lympung ki khynnah ha Mukhap la rakhe ha ryngkat ka jingbud ryntih ïa ki kyndon ban ïada na ka khlam Covid 19, hadien bala ïoh jingbit na u Deputy Commissioner ka West Jaiñtia Hills ban pyllong ïa ka namar mynshem snem 2021 ym shem la ïoh lad ban pynlong ïa kane ka Lympung.
U Paiem Ainam Manik Syiem, Syiem ka Hima Mylliem ula long kum u kongsan ha ryngkat ka jingdonlang u MLA ka thaiñ ma Nujorki Sungoh uba ka plie ïa u maw sahnam jong kane ka Lympung mynta u snem ha shnong Mukhap, ryngkat u MLA ka 2 Jowai Constituency ma Wailadmiki Shylla, MDC ma Winning G. Sungoh, ki President bad Secretary jong ki Seiñ Raij bapher bapher, ki Dolloi bad ki paid ñiamtrai jong ka Seng Khasi.
Ha kane ka lympung ki don shibun ki prokram bapher bapher bala pynkhreh da ki seng khynnah na kylleng ka Ri Khasi Jaiñtia, ba la pynïaid da ki ar ngut ki heprit u Kyrmenmi Ymbon bad ka heprit Rideihok Niang kiba dei na ka Seng Khynnah Seng Raij Mukhap.
Ki prokram ki kynthup naduh ka jingaiti Dongmusa, ka jingnguh Blei, ki jingrwai, ka Drama Lyngkot, ka jingpule sneng tymmen, kala don ruh ka jingsam khusnam sha ki nongjop ha ki jingïakop bapher bapher ba la dep pynlong, katba ha ka por janmiet la shimti ïa ka dongmusa sha ka seng khynnah seng khasi Krang, Deingiei pyllun bad la pynhiar ia ka Lama da u Rgh. D. Dkhar President Seng Khasi Kmie.
