Jowai: Ki 7 ngut ki nongialehkai jong ka Bouncers Association of Meghalaya – Jaiñtia Hills (BAM-JH) kiba kynthup ia u Hame Shaniah Suiam, ka Nisanshwa Lyngdoh, u Bantei Sungoh, u Heimonmi Suchiang, u Teimiki Sungoh, u Pynshraiñ miki Rabon kiba dei na ka shnong Shangpung bad u Mighty Sword Tyngkan na Mowkyndeng kila poi shala ka District hynnin ka sngi hadien ba kila lah ban wanrah burom ia ka jylla Meghalaya ha ka jingiashim bynta ha ka Kick boxing, ka ‘WAKO India Seniors & Masters National Kickboxing Championship 2021’ kaba la pynlong ha Goa naduh ka 26 haduh ka 29 tarik Nailar 2021.
Ia kine ki rang bad thei ialehkai la pdiang burom da ki nongialam jong ka Bouncers Association of Meghalaya (BAM) Jaiñtia Hills, hapoh ka jingialam jong u President samla Yoosar Kynjing bad u ma Iahmi Khyriem (Adviser) ryngkat ka jingiadon lang ki dkhot ka Jaiñtia Student Union (JSU) hapoh ka jingïalam u General Secretary samla Treiborlang Suchen. Ia kane ka jingpdiang burom la pynlong ha jingkieng Myntdu surok Jowai-Shillong hynnin ka sngi.
Napdeng kine ki rang bad thei ialehkai ki lai ngut kiba la ïoh takma ki kynthup ia u samla Hame Shaniah Suiam uba la ioh ia ka takma ksiar bad ka takma rupa, kumjuh ia u Samla Bantei Sungoh bad ka Nisanshwa Lyngdoh kila ioh ïa ka takma rnong.
