Ka samla Sawakani Lakiang 20 snem kaba shong basah ha PHE Khimmusniang, Jowai, kala ioh ban wan rah ia ka nam bad burom ia ka jylla bad ka jait byriiew hi baroh da kaba kala jop ha ki ar tylli ki kyrdan ha ka jingiakop Women Sports Model ha ka kyrdan ba ar bad ha ka kyrdan ba lai haka Bikini (Women) MR & MS India, 11th national Body Building & Fitness Championship kaba la long ha nongbah Jaipur Rajhastan, ia kane ka jingiakop la bei da ka WFF International, ia kaba la pynlong ha ka 15, 16 bad 17 tarik mynta u bnai Nohprah 2023.
Ha ka jingiadei bad kane ka jingjop jong ka samla Sawakani Lakiang kaba dei ruh ka dkhot jong ka Bouncer Association of Meghalaya (BAM) Jaintia Hills Unit BAM, mynta ka sngi ki dkhot jong ka BAM ryngkat bad kiba ha iing ha sem jong ka ki la pdiang bad pynkup burom ia ka ha shwa ba kan rung sha nongbah Jowai ha Jingkien Pam blah. (Jingkieng Myntdu).
Ka Sawakani ka dei ka khun jong ka kong Irina Mary Lakiang bad u Wadbha Lyngdoh, kaba la juh ioh rah dang shen ha ka jingiakop pyni doh ksah kaba la pynlong ha nongbah Jowai, bad ha Jharkhan bad kiwei de.
Shuh shuh haba kren mynta ka janmiet na ka liang ka Sawakani ka ka la ai nguh ia u Blei, ïa ki kmie ki kpa, ïa kiba ha ïing ha sem, ïa ki dkhot jong ka BAM Jowai, ïa ki nonghikai (Coach), ïa u OC Jowai, DC West Jaiñtia Hills, DTO, DSO bad kumjuh ïa u MLA ka Jowai u ma Wailadmiki Shylla kiba la kyrshah ïa ka ha ka jingleit shim bynta ka jong ka sha katei ka nongbah.
