Ban kham pynsuk bad ban myntoi ki paid nongshong shnong jong ka East Jaiñtia Hills District bad kumjuh ïa ki nongshong shnong ka thaiñ Narpuh ka MDC jong ka 28-Narpuh ka kong Deiwipaia T. Tongper kala wanrah shibun tylli ki mat jingïakren hapoh ka ïing Dorbar mynta ka sngi (27/03/25).
Na ka bynta ban pynsuk ka rukom ïoh ïa ki kot Land Holding Certificate (LHC) na ka bynta ki jaka puta jong ki, ka kong Deiwipaia kala dawa na ka Executive Committee jong ka District Council ba kan buh noh ïa ka tnad treikam Revenue hapoh Khleihriat kaba dei ka nongbah jong ka EJ Hills District.
Ka kong Deiwi kala ong na ka por sha ka por ka buh jingeh shibun ïa ki paidbah na East Jaiñtia Hills ban leit mih shaduh Jowai, kaba la ktah ïa ka por jong ki wat kiba bun ki briew kila thait ban leit leh ïa ki LHC nalor sa ka jingslem ban ïoh ïa ki kot LHC, kaba shim por da ki bun bun bnai.
Ha ka jingïadei bad ka rukom thung kam thung jam hapoh ki Karkhana pynmih Dewbilat, kala ong ba kum ka Council kala dei ban pynbeit bad pyndonkam ïa ka bor ha ka rukom pynrung kam kham bun ïa ki trai jylla ha ki Karkhana Dewbilat kiba don hapoh ka East Jaiñtia. Kumba long mynta ki don haduh 90% ki kam hapoh kitei ki Karkhana la trei beit tang da ki bar jylla kala ong.
Kala kren ruh halor ka jingeh ki nongrep trai jylla, namar ka jingïoh lad ki bar jylla na, Kalain, Assam ban wan pynpoi ïa ki mar rep jong ki shapoh kane ka thaiñ East Jaiñtia bad kane kala ktah nyngkong ïa ki trai jylla kiba rep ïa u kwai bad tympew kiba shem jingeh bha na ka jingshah khñiot dor ha ki briew ba nabar.
Ha kaba ïadei bad ki kam jngohkai pyrthei ka kong Tongper, kala ong ki kam jngohkai pyrthei hapoh ka Elaka Narpuh ki long kiba riewspah bha da ka jingdon ki jaka ba itynnad kum ha ka shnong Sunapyrdi, Shymplong, Borsora bad kiwei kiwei. Kumta ka kyntu ïa ka Council lyngba kane ka Mang Tyngka ba la wanrah ba kan peit ïa kane ka jingdonkam jong ka thaiñ.
Ha ka jingïadei bad ka jingpynmih tdem pum pum jong ki Cement Plant, ka kong Dewi kala ong ba kane kala ktah bha ïa ki nongshnong shnong kum ka shnong Lumshnong, Chiehruphi, Thangskai Wahiajer bad kiwei de ki shnong ba marjan, kumta ka kyntu ïa Council ba kan bthah ïa kitei ki Cement Plant ban kin shna bha ïa ki Treatment Plant khnang ban lait na kitei ki pum pum jakhlia.
Shuh shuh ka kong Deiwipaia kala buh jingkylli haduh katno tylli ki Cement Plant kiba don hapoh ka Elaka Narpuh la ïoh jubab na u CEM ma Thombor Shiwat ba ki don haduh 4 (saw) tylli. Kala kylli ka Council ka buh ne em ïa ki kyndon treikam jong ki ha ka NOC; la jubab haoid ki don ïa ki kyndon treikam bala buh da ka Council.
Ha kaba ïadei bad ka jingai NOC ban leh ïa ka Survey na ka bynta ban shna lynti Rel ha Ri-Lum Jaiñtia, ka MDC kala buh jingkylli halor ka jingwan leh survey ïa ka lynti Rail haduh shnong Lumshnong ha ki snem bala dep; hynrei na ka liang jong u CEM ula jubab ba haduh mynta kam pat don kano kano ka jingtip kaba poi shapoh ka Council lane don kiba pan NOC ban leh ïa ka survey lain Rel.
Ha kaba ïadei bad ka Khliehriat Town Committee la jubab da u EM ba dei peit ma M.M Swer ba kane ka Committee kala duh noh naduh u snem 2017 namar ba kam lah ban pynmih Fund nalade, bad na ka liang ka Council ruh kam lah shuh ban ai jingïarap ïa katei ka Committee.