U Bah Kyrmen Shylla, MLA Khliehriat Constituency, (East Jaintia Hills) uba dei ruh u Myntri ba khmih ia ka tnad Excise, Revenue, Legal Metrology bad tnad Home (Passport) u la ioh ban pynsngew ha ka Dorbar Mang Tyngka 2025 ia ka kaiphot kaba la ioh lum na ka jingshlei um bad ka jingjur u slap ha u snem 2024.
Ia kane ka kaiphot la jubab ruh na ka jingbuh jingkylli jong u Rupa M. Marak, MLA 49 Dedenggre, West Garo Hills (All India Trinamool Congres) kaba ong “Hato ka tnad ka don ia ka jingkheiñ ba tikna ha kaba iadei bad ka jingshlei um ha u snem 2024 kaba hap hapoh Dedenggre Community & Rural Development Block, hato ki lad jingïarap la pynpoi sha ki longïing kiba la mad ia katei ka apot, katno ka Sorkar Jylla ka la pynlut ha kaba iadei bad kane ka bynta, hato ka Sorkar ka la wad ia ki lad ki lynti na ka bynta ban iakhun ban kiar na kaba shah ktah ha kum kine ki jingeh.
Haba jubab ia kine ki jingkylli lane ban ai ia ka kaiphot kaba tikna, u Bah Shylla u la iathuh ba haduh 28 tylli ki longïing ki la shah ktah na katei ka jingjia. U la pyntikna ruh ba ka tnad ka la leit hiar bad jurip ruh sha katei ka jaka ban leit ai ia ka jingïarap. Na ka bynta ka jingkheiñ ba tikna ha kaba la pynlut bad noh jingïarap, u Myntri u la ong ba khlem ioh ka ka jingkheiñ ba tikna haduh kane ka tarik, wat la katta ka tnad ka dang treikam haduh mynta ban ioh ia ka jingkheiñ ba pura, ong u Bah Kyrmen.
Nalor kata, u la pynpaw ruh ba ka Sorkar lyngba ka tnad ba dei khmih ia kitei ki bynta ki la wanrah ruh da ka online reporting system lane kita ki kor kiba lah ban iathuh lypa ia ka jingjur u slap, ka jingeriong, ka jingshlei um lyngba ka kor computer.
Ban pyntikna shuh shuh ia ka jingtreikam jong ka tnad, u Myntri Rangbah ka jylla Conrad K.Sangma u la ieng ban kyrshan ia u Bah Shylla da kaba ong ba ka Sorkar ka la ïakhun tyngeh ban wanrah ia ka jingshngaiñ ha ki bynta bapher bapher jong ka Jylla bad da kaba pyntreikam ruh da ki kor treikam ba thymmai kiba katkum kane ka juk (new technology), kata ia kaba yn batai lypa ia ka jinglong jong ka suiñ bneng, ka jingbatai lypa ruh ia ki sngi ban wan, kata ia ka jingjur u slap, eriong, jingshlei um bad kiwei “hooid ngi la shim ia ki synjam ba tikna na ka bynta ban kiar na ka jingshah ktah ha ki jingshlei um bad ka jingjur u slap ha ka jylla.
U Bah Kyrmen Shylla u la iathuh ruh ba ha ka 11 Naitung la ioh jingtip na ka ophis DC ba ka jingshlei um ha Dedenggre ka la kiew bha bad ki lad jingïarap ki la pynbiang bad pynpoi ha ka 12-13 Naitung mynta u snem.