U Chief Executive Member (CEM) ka Jaiñtia Hills Autonomous District Council (JHADC) mynta ka sngi sdang ïa ka Dorbar ula wanrah ïa ka Mang Tyngka kaba duna ïa ka jingpynlut da 30.60 klur tyngka na ka bynta ka snem 2023-2024.
Kane ka mang tyngka ka kynthup ïa ka jingpynlut kaba T.205,19,52,500.00 (Arspah san klur khadkhyndai lak sanphew ar hajar san spah) tyngka katba ka jingmit pat ka long T.174,59,38,400.00 (Shispah Hynñiewphew saw klur san phew khyndai lak lai phew phra hajar saw spah) tyngka bad ka paw ba ka jingpynlut ka heh ban ïa ka jingïoh haduh T.30.60,14,100 (Lai phew klur hynriew phew lak khadsaw hajar shi spah) tyngka
Katkum kane ka mang tyngka ba la wanrah u CEM katkum ka Rule 109 jong ka Assam and Meghalaya Autonomous District Council (Constitution of District Council) Rules, 1951 jong ka District Council, la pynsngew ruh katkum ka Financial Year 2022-23 lyngba ka ka Executive Committee la ïoh jingkheiñ ba ka jingïoh lum ka long T. 73,18,11,649/- na ki marpoh khyndew Major Mineral bad T.14,65,67,854/- na ki minor Mineral, katba na ki khajna (Taxes) na ki kali mator ym pat ïoh lum jingkheiñ.
Ïa ka bhah pisa bala ïoh na ka sorkar jylla la dep ban siew ïa ka tulop basah jong ki nongtrei ka Council na ka bynta 13 bnai kata naduh May 2021 haduh May 2022 bad ban siew ïa ka ram (loan) sha ka tnad Civil Works bad kiwei de ki jinglut jingsep.
Ha kaba ïadei bad ki kam pynroi ka Council kala dep pyntrei ïa ki Grand bala ïoh lum haduh 234 ki skim/project naduh u April 2022 haduh January 2023 ba kynthup ïa ki tyllong umbam, ki ïing skul, Community Halls, ki jaka leit bar, ki madan, ki lynti ïaid kjat, ki jaka sait jaiñ nalor kiwei de.
Haduh mynta ka Council kam pat lah ban pyndap dalade ïalade na ka bynta ki jingdonkam baroh hynrei ka dang donkam ka jingïarap kaba wan lyngba ka sorkar kmie na ka ‘15th Finance Commission’.
Ha kaba ïadei bad kine ki jingdonkam jong ka Council na ka liang u CEM ka JHADC ula khot ka jingïatrei lang jong baroh naduh ki Member, ki nongtrei ba kin ai ka jingkyrshan ïa kane ka Executive Committee ha kine ki saw snem ba la dep, kiba la lah ban pynïaid ïa ki kam ka Council na ka bynta ka jingmyntoi jong ki paidbah ka Jaiñtia Hills hi baroh kawei.