U Chief Executive Member (CEM) ka Jaiñtia Hills Autonomous District Council (JHADC) u ma Thombor Shiwat mynta ka sngi 26 tarik u Lber, 2025 kaba dei ka sngi sdang ïa ka Dorbar ula wanrah ïa ka Mang Tyngka kaba duna ïa ka jingpyllut da 11.32 klur tyngka na ka bynta ka snem 2025-2026.
Kane ka mang tyngka, ka kynthup ïa ka jingïoh kaba T.245,90,55,900/- (Arspah sawphew san klur khyndaiphew lak sanphew san hajar khyndai spah) tyngka, katba ka jingpyllut pat ka kot sha ka T.257,23,44,200/- (Arspah sanphew hynñiew klur arphew lai lak sawphew saw hajar ar spah) tyngka bad kane ka paw ba ka jingpyllut ka heh ban ïa ka jingïoh haduh T.11,32,88,300/- (khadwei klur laiphew ar lak phra phew phra hajar lai spah) tyngka.
Katkum kane ka mangtyngka ba la wanrah u CEM katkum ka Rule 109 jong ka Assam and Meghalaya Autonomous District Council (Constitution of District Council) Rules, 1951 jong ka District Council, la pynsngew ba ka jingïoh jong ka Council na ka bhah pisa (dues) naka sorkar jylla haduh u Kyllalyngkot 2025 kala long kaba ïaid beit, wat ïa ka tulop kaba dang sah yn sa pyllait noh, katba ïa ka arrear jong ki nongtrei ka Council la pyllait haduh 80% na ka fund jong ka council jong ka Financial Year 2024-2025.
Na ka bynta kiwei de ki kam pynroi kiba wan na ka sorkar kmie (Centrally Sponsored Schemes jong ka snem 2024-2025 la ïoh pdiang T.6,32,400/- tyngka lyngba ka Digital India Land Record Modernization Programme (DILRMP) bad na ki Tied bad Untied Grand ka Council kala lah ban pyntreikam haduh 422 tylli ki skim ha kylleng ki jaka hapoh ka East bad West Jaiñtia Hills kiba kynthup ïa ki surok, ki umbam umdih, ka jingthied ïa ki CGI Sheet, ki jingtei kynroh, ki pipes um nalor kiwei de lyngba ka Financial Year 2023-2024.
Na ka liang ka Council kala dep ruh ban plie ïa ka Jaiñtia Dorbar Hall ha ka 29 tarik u October, 2024, la pynsngew ba ka Executive Committee ba rim kala la shim ruh ïa ka rai ha ka 28 July 2020 ban pynduna noh ïa ki nongtrei hapoh ka Council na ka 1490 sha ka 1215. Kumjuh ruh ka Council kala dep ruh ban pass ïa ka aiñ ba kynthup ïa ka Jaintia Hills Autonomous District (Trading by Non Tribal First Amendment) Rules 2023 nalor kiwei de.
Haba pynkut u CEM u khot lang ïa baroh ki para MDC kiba la jop ïa kane ka Election shapoh ka JHADC ba kin long kiba ïatreilang bad ka Executive Committee ban pynïaid shakhmat ïaka Council ha baroh ki liang.
