U Chief Executive Member (CEM) ka Jaiñtia Hills Autonomous District Council (JHADC) u ma Thombor Shiwat mynta ka sngi Balang kaba dei ka sngi sdang ïa ka Dorbar Mang Tyngka ula wanrah ïa ka Mang Tyngka jong ka Council na ka bynta ka snem 2026-2027 kaba kot T.293,64,42,000/- kaba duna sa T.15,62,38,500/- klur tyngka na ka jingpyllut.
Kane ka mang tyngka, ka kynthup ïa ka jingïoh kaba T.293,64,42,000/- tyngka, katba ka jingpyllut pat ka kot sha ka T.309,26,80,500/- tyngka bad kane ka paw ba ka jingpyllut ka heh ban ïa ka jingïoh haduh T.15,62,38,500/- (khadsan klur hynriewphew ar lak laiphew phra hajar san spah) tyngka.
Katkum kane ka mang tyngka bala wanrah u CEM katkum ka Rule 109 jong ka Assam and Meghalaya Autonomous District Council (Constitution of District Council) Rules, 1951 jong ka District Council, ula pynpaw ka jingheh jong ka mang tyngka ka kynthup naduh ka jingpynkiew ïa ka tulop ki nongtrei, ka bai bam tymmen (pension) bad ki jingpyntreikam ha ki tnad bapher bapher jong ka Council.
Ka Council kala pyllait ruh ïa ka 3rd & Final Installment Payment kaba dang sah 20% ka Arrear Revised Pay & Pension jong ki nongtrei ka Council, nalor kiwei de ki kam pynroi kiba wan na ka sorkar kmie (Centrally Sponsored Schemes jong ka snem 2025-2026 ba la ïoh pdiang T.3,50,00, 000/- tyngka lyngba ka Digital India Land Record Modernization Programme (DILRMP) bad na ki Tied bad Untied Grand ka Council kala lah ban pyntreikam haduh 48 tylli ki skim ha kylleng ki jaka hapoh ka East bad West Jaiñtia Hills ba kynthup ïa ki surok, ki umbam umdih, ki dam, ki painkhana, ki madan, ki jingtei kynroh, ki footpath, ki ïing skul, ki Community Halls bad kiwei de jong ka Financial Year 2025-2026.
La pynpaw ruh ïa ki kam kiba ka Council kala leh naduh ka jingpynkhreh ïa ka “District Fund Rules” jong ka JHADC ïa kaba yn sa wanrah ha ka Dorbar Lyiur ka ban long ha u bnai Naitung (July) hadien bala ïoh mynjur na u Lat ka jylla. Nalor ka jingpynkylla ïa ka rukom treikam (Digitalization) ïa ki khlaw ka Council, ka skim thymmai jong ka tnad Forest na ka bynta san snem kan ban treikam naduh 2026-2027 bad ka Jaiñtia Hills Autonomous District Council Service Rules, 1981 kaba dang ïaid shakhmat ban examine biang.
Ïa kane ka Mang tyngka jong ka snem 2026-2027 yn ïatai lashai ka sngi Palei, hashwa ban ïoh ka jingmynjur da ka Dorbar ha ka sngi Thohdieng.
Ha kane ka sngi ka Dorbar kala pynskhem ïa u ma Het Pohthmi ban long kum u Chairman ka Planning Board bad u ma Octomewot Lamin kum u Chairman ka Resources Mobilisation Committee.
