Ha ka jingbuh sobjek jong u MLA ka Mawlai Constituency, Bah Brightstarwell Marbaniang halor ka jingkren jong u Bah Kyrmen Shylla ha ka 26 tarik Rymphang 2025 lyngba ka Kot Khubor khubor kaba ong “Ai ba ki paidbah ka Jaintia kin rai halor ka lynti Rel, nai tuklar kiba nabar”. U Myntri Rangbah barim ka jylla, Dr. Mukul Sangma u la kren da kaba pynthanda ia baroh arliang kata na ka bynta ka liang synshar bad liang pyrshah ba kaei kaei baroh kadei ban long na ka bynta ka jingbha.
“Kum ki Nongïalam kiba don ia ka jingkitkhlieh ngi dei ban pynpaw ia ka jingshimkhia na ka bynta ka lawei jong ki briew jong ngi. Ngi dei ban ia iatylli bad ieid iwei ia iwei. Nga tharai baroh ki Garo, Khasi, Jaintia bad kiwei ki tip ia ka jingkordor ban ia tuidlang ban pyntikna ia ka jinglong kawei bad kadei mynta hi ka por ban iaid shaphrang” ong u Dr. Mukul.
Ka long ruh kaba kham phylla bad kham pher ba u Sangma u la wanrah ruh da ki Dkhot na Kotbah (Bible) kaba kren ia ka jingieid bad ka jinglehhok ka jaitbynriew ” ngi dei ban sngewsarong ba ngi dei kita ki briew kiba don ia kata kawei ka jingngeit bad lada phi pule na ka Shithi sha ki Nong Rom Lynnong kaba 13 Dkhot kaba 8-10 ka kren ia kane ka bynta” ong une u Nongïalam ka Liang Pyrshah.
Haba phai pat sha ka jingkren jong u Bah Brightstarwell Marbaniang uba dei ruh u Dkhot ha ka Assembly uba la wanrah ia kane ka sobjek u la pynshai da kaba ong “Kum ka seng ngim pyrshah ia ka roi ka par lane pyrshah lynti rel khamtam ba ka jylla jong ngi ka donkam ia ka ki rel kiba bha hynrei kane kan jia tad ynda la pynbiang ia ki jaka ap phira ne ki jaka ban pyntikna ba kin ym don ki jingioh rung pathar ki briew nabar jylla”.
U la pynkynmaw ruh ba ka jylla Nagaland bad Mizoram ki dei ki Jylla kiba la pyntreikam ia ka Inner Line Permit (ILP) bad lada lah ban pyntreikam da kane ka lynti kan long ka jingkyrkhu ia ka Jylla lada poi lynti Rel.
Ha kaba iadei bad kane mat, ka Seng NPP bad katto katne ki dkhot UDP ki la pynpaw ia ka jingkyrshan ba pura na ka bynta ban wanrah ia ka lynti Rel ha ka Jylla.