U MDC ka 4-Amwi Khliehtyrshi ma Madonbai Rymbai uba ju long u CEM barim ka JHADC mynta ka sngi ula wanrah Motion hapoh ka ïing Dorbar jong ka JHADC ban ïatai halor ka 15th Finance Commission kaba wan na ka sorkar kmie sha ki District Council hapoh ka Jylla.
U ma Madonbai Rumbai ula buh jingkylli balei kane ka skim na ka bynta ka Tied bad Untied Grant ka dang sahteng haduh mynta ban pynpoi sha ka Council, da kaba u kyntu jur ïa ka Executive Committee lyngba u Dy. CEM ma Lasky Rymbai ba un shimkhia ban leit wad ïa kane ka skim ba sahteng na ka bynta ka jingmyntoi jong ka Council hi baroh kawei.
Haba pynshai u ma Lasky Rymbai ula ong ba kane ka skim kala sahteng naduh 2020-2026 kaba long ka bhah kyrpang na ka bynta ki lai tylli ki District Council hapoh ka jylla katkum ka Article 275. Ha kaba ïadei bad kane ka skim na ka liang ka sorkar kmie naduh u snem 2021 kala bthah ïa ki Council ban pyntreikam noh da ka online system bad wat ïa ka tulop ki nongtrei la sdang ban leh da ka online, ula ong.
Shuh shuh ula pynsngew ruh napdeng ki ar tylli ki Council ka KHADC bad ka GHADC, hynrei ka JHADC ka long kaba duna ka jingïoh ïa kane ka bhah namar ka jingkheiñ ïa ka jingdon briew. Kumta ula pyntip bala dep phah ïa ka Untied Grant bad na ka liang ka sorkar jylla shen kan sa pyllait pisa ha kine ki sngi ban wan.
