Ki samla pule ka Skulbah North Eastern Hills University (NEHU) hapoh ka shatri jong ka NEHU-SU bad ka jingiatreilang jong ka KSU-NEHU ki la rai ban sangeh noh ia ka jingshah thngan, kata hadien 15 sngi ba la iaid ia jingiakhih.
Katkum ka jingpynshai na ka liang u samla Sandy Sohtun President ka NEHU-SU, la ong ba kane ka jingsangeh shah thngan kam dei kaba la pynkut ia ka jingiakhih hynrei kadei ka jingshong jahthait shipor namar bun na ki samla kiba la shong shah thngan kim long shuh ka met namar ka jingtlot bad ka jingshitom. U la ïathuh ba la ioh ruh ia ka jingai-jingngmut na kiba bun, kynthup na ki Nonghikai ban sangeh noh ia kane ka jingiakhih bad ban pyrkhat nyngkong ia ka koit ka khiah. U la pynshai ruh ba da lei lei ruh kin ym pdiang ba U Prof. P.S Shukla, Vice Chancellor (VC) kane ka skulbah NEHU un wan shimti biang ia ka shuki.
“Hooid ka jingiakhih ka la seisoh 80% hynrei ngin ym sangeh” la ong u samla Sandy. Shuh shuh u la ong ” ka NEHU kam dei ka jaka theh ñiut ba phin wan theh jaboh katba mon”. Ia kine ka kyntien la kren siat halor ka jingphah ia ki nongtrei kiba la kyntaid bad ki bym wanrah ia ka jingkiew bad ka jingroi ka Skulbah NEHU.
U la ai Khublei ruh ia baroh kiba la shimkhia bad kiba la ïashim bynta na ka bynta kane ka jingiakhih bad ong ba dei lyngba ka jingkyrshan lang jong baroh ba u VC u la phet rieh bad mynta la ioh ia u VC uba shu thung shipor.
