Wat hadien ba ka Ïing Bishar ba ha khliehduh ka Jylla, ka la ioh ban bishar lyngba u Justice I.P Mukherjee bad Justice W. Diengdoh na ka bynta ka mukotduma jong ki Nongdie madan pyrshah ia ka Sorkar kaba la thmu ban weng ia baroh ki nongdie madan na 9-Lad sha ka jaka ieng kali jong ka MUDA, la iohi sakhi ba katei ka hukum ba la buh da ka Ïing Bishar ka khlem treikam ha ka por mynmiet.
Ha ka jingleit wad bniah jong u Nonglum khubor ka Yutipnews, la lap ba ki nongdie madan kiba die mynsngi ki dei 90% kiba don ia ki Laisen (Certificate of Vendors – COV) hynrei kiwei pat ki dei kiba dang shong be-aiñ wat hadien ba ka Sorkar Jylla lyngba ka Shillong Municipal Board (SMB) ka la bthah ba ki nongdie madan ba ki dei ban don ia ki kot ki sla ban pynshisha. La don katto katne kiba la iathuh ba ki la dep ban aplai ia ki syrnod hynrei kim pat ioh haduh mynta, kumta ban iaid ka kam, kim banse ban bteng ia ki jingdie.
Hadien ba ka Meghalaya High court ka la pdiang bad bishar ia ka mukotduma ba la buh da ki nongdie madan, hynnin ka sngi ka la ai ia ka hukum ba ki nongdie madan kiba don ia ki syrnod ki dei ban shong die katkum ka por ba la phiah ia ki khnang ba kan ym wanrah ia ka jingkhapngiah, kata naduh ka por 12:30 mynsngi haduh 2 baje nohphai sngi bad 7:30 mynmiet haduh 9:00 mynmiet. Kane ka Hukum kan dei ruh ka ban ym ktah ia ki kali kiba iaid lyngba na katei ka lynti bad kan iarap ruh ia ki nongdie madan kiba la im jakpoh na katei ka jaka.
Ka Ïing Bishar ka la dawa na ka Association ba ka dei ban wanrah ia ka kyrteng jong 349 ngut ki nongdie madan bad ia ki bym don kyrteng ym lah ban phriang die jingdie ha 9-Lad.
Haba bishar na ka Ïew ha ka por mynsngi, la i kumba ka aiñ ka la treikam hynrei katkum ka jingleit ban sakhi ha ka por mynmiet, ka rukom die jingdie ka long thurmur ha kaba la iohi ba bun ki nongdie madan ki bym don syrnod bad kiba la ioh ban die mynsngi ki la sei biang ia ki tiar jong ki ha ka por mynmiet. Ha katei ka jingleit sorjamin, la lap ba ka lynti kaba la ai die jingdie mynshwa ka la khapngiah biang kumba ju long, ha kaba ki kali kiba iaid lyngba na 9-Lad ter ter sha Dreamland ki la bun ba sahkut na ka jingkhapngiah jong ki nongdie madan kiba la phriang ia ki mar jong ki khlem da iaid shuh katkum ka hukum ba ka buh.
Hato kane ka jingshim kabu jong ki nongdie madan ka dei namar ba lah miet lane ka dei ba ka SMB bad ka Association jong ki nongdie madan kim treikam ha ka por mynmiet?
