Wat hapdeng ka jingpyrshah jong ki sengbhalang, hynrei ka public hearing jong ka Meghatop Cement ka ba la long mynta ka sngi ka 18 tarik Risaw 2024 ha Wahiajer, East Jaiñtia Hills District, ka la long kaba iaid beit iaid ryntih khlem don kano kano ka jingshahpynthut.
Kawei na ki daw ba ym don ka jingpynthut ha kane ka public hearing ka long ba ki kynhun sengbhalang kiba wan ban pyrshah ia kane ka public hearing kim shym la ioh lad ban rung sha ka jaka kaba la pynlong ia kane ka public hearing. Ia kane la sakhi da ki nongpathai khubor ba kila shah khang lynti naduh ka khyrdop kaba nyngkong haduh ka khyrdop kaba ar shwa ban rung sha madan kaba pynlong ia ka jingialang.
Ha kane ka sngi ba pynlong ia ka jingialang paidbah la pyniaid da u bah Franky Laloo, EE Environment jong ka Meghalaya Pollution Control Board (MPCB) ha ka jingdon ryngkat u Member Secretary ka Meghalaya Pollution Control Board u Dr. G. H. Chyrmang, u Additional Deputy Commissioner ka East Jaintia U Bah G. Warjri, ha ryngkat ki bor pyniaid District jong ka East Jaiñtia Hills District, u Doloi ka Elaka Narpuh, ki Waheh Shnong ka thaiñ Elaka Narpuh ki paidbah nongshnong shnong ka thaiñ bad ki nongpyniaid jong ka Meghatop Cement pvt Ltd.
Ha kane ka sngi ba pynlong ia kane ka public hearing la don haduh 11 ngut ki nongkren kynthup ia ki Dolloi ka Elaka Narpuh u Manbha Kyndoh, u ma Desus Pohshna uba dei u Ex-MDC, Waheh Shnong ka Pyrtakuna u Love You Bareh, Waheh Shnong ka shnong Wahiajer u Banjop Suting, Waheh Shnong ka Tongseng u Vailin Suchiang, u Seccretary Shnong ka Sunapyrdi u Daiaphi Lamare, u Waheh Shnong ka Kuliang u Min Lamare bad kiwei. Baroh ki nongkren ha kane ka public hearing ki pynpaw ka jingkyrshan ba pura ia kane ka Karkhana pynmih dewbilat ba thymmai ba la tip kum ka Meghatop Cement bad ki la pynpaw ba ka jingwan kane ka karkhana dewbilat thymmai kan wanrah ka jingmyntoi ia ki paidbah da ka ba pynrung kam ia ki paidbah nongshong shnong kane ka thaiñ bad ki la kyntu ban bud ryntih ia ki aiñ jong ka mariang.
Ha shwa ban kut ka jingialang la don ka jingkhot ba la don mano mano ki ba kwah ban kren na ka liang ki paidbah ki lah ban wan, hynrei ym shym la don ba wan. Ha ka jingbym don kiba wan la ioh noh ka jingkren na u Additional Deputy Commissioner ka East Jaintia u Bah G. Warjri bad u la ai khublei ia ki nongpyniaid ka Meghalaya Pollution Control Board, ka ophis jong u SP ka East Jaintia, Dolloi Elaka Narpuh ki paidbah nongshong shong ka thaiñ Wahiajer, ia ki sengbhalang bapher bapher bad kiwei kiwei. U la ong ba kane ka jingialang ka long kaba iaid beit iaid ryntih bad u ai khublei kyrpang ia baroh kiba la ai jingkren bad kyrshan ia kane ka jingialang paidbah jong ka Meghatop cement bad ula pynwai ia ka jingialang.
Na ka liang U Member Secretary ka Meghalaya pollution Control Board u la ong ba kane ka jingialang ka long kaba sngewtynnad bad ka rai ba khatduh ka shong ha ka ophis jong ka Ministry of Environment & Forest ban ai clearance ia kane ka karkhana thymmai, “Namar sa shisien ngan ong biang ba ka rai ba khatduh ka shong ha ka Ministry of Environment & Forest na ka liang ka Pollution Control Board ka shu pynlong ia kane ka jingialang bad ngi hap record bad shondur bad ngin hap ban phah sha ka Ministry bad ka rai ba khatduh ka shong ha ka Ministry of Environment of Forest”, u la pynkut.
