Ka Mihmyntdu Community Social Welfare Association (MCSWA TI CC ) Khliehriat ha ryngkat ka jingiatreilang bad ka ophis District Social Welfare Officer East Jaintia Hill District hynnin ka sngi (31.05.2022) kila pynlong ia ka Sensitisation Cum Health Camp ha ka shnong Umlawang EJH District, halor ka phang “On Need of Elderly Care (Geriatric Care) Cum Health Camp for Elderly”.
Ia ka prokram la pyniaid da ka kong R. Patlong PM MCSWA TI CC Khliehriat bad la ioh ia ka jingkren pdiang na u Waheh Shnong ma W. Lyngdoh.
La ioh ka jingkren lyngkot na u ma Patric Dkhar Supervisor DSWO EJH uba la batai shaphang ki skhim kiba lah ban ioh na ka ophis DSWO kiba kynthup ia ka bai bam tymmen ia kiba la kynjoh ia ka rta ba 60 snem ia ki kynthei bad 65 snem ia ki shynrang. Ka skhim na ka bynta ki khynnah kiba don jingduna dkhot met, ia ki kynthei kiba shah lehbeiñ kiba lah ban ioh na ka One Stop Center bad kiwei kiwei de.
I Dr. JN Shullai, Director MCSWA haba ai jingkren ila batai shaphang ka jingdonkam ban sumar bha ia ki briew kiba la heh rta. Kala ong ruh ba ki tymmen kim dei ban shu dih stad nalade ne ban pyndih kino kino ki jait dawai da kaba shu thied na ki Pharmacy khlem ka jingbthah jong ki Doctor ia kiba la heh ka rta. Kiba ha ïing ki donkam ban leit pyni Doctor mar mar haba kiba la tymmen ne heh rta ki ud shitom ha kano kano ka por. Kala kyntu ia kiba la heh rta ba ki dei ban bam ki jingbam kiba trei, ban thiah ha ka por, ban long kiba leh khuid bad ban leh ia ki jingkilan met manla ka sngi.
Ka Dr. Shullai kala ong ruh ba ka por ka la dei imat ba ki briew kiba la heh ka rta ki donkam ban don ia ka jaka ban ia kynduh lang para maki, khnang ba kin ioh ban pyllut ia ka por bad ban iathuh khana sngewbha para bala heh rta.
U Dr. J. Nongtdu M/O OST Center haba kren ula batai shaphang ka jingdonkam ban leh ieit ia kiba la tymmen. Ula ong ka long kaba sngewkmen ban tip ba haduh mynta mynne ba ha ka shnong ka thaw jong ka District ym pat don ki riew tymmen kiba la hap ban leit sah sha ki ïing ri tymmen namar ba ki khun ki kti ki ri bad sumar bha ia ki. Ula kyntu ia baroh ban pynlong ia ka jingim kaba kmen bad sngewbha namar kan wanrah ia ka jingkoit jingkhiah ha ka jingim briew.
Iaki kyntien ai khublei la ai da i kong Milanda Rymbai ORW MCSWA. Hadien jong ka program ka la don ka jingsumar (check up) ei, ha kaba da ki saph ngut ki khun jong ka shnong ki la ioh jingmyntoi.
