U Symbud Myntri Rangbah ka sorkar jylla u ma Sniawbhalang Dhar uba dei ruh u Chairman jong ka Regional Committee ka West Jaiñtia Hills mynta ka sngi ba ar jong ka 8 tarik u Naitung ula leit hiar sha shnong Lapangap, West Jaiñtia Hills, hadien ba la mih ki jingjia ïakajia pud dang ha une u bnai bala dep hapdeng ki Khasi Pnar bad ki Karbi.
Ha kane ka sngi la synranlang ia u Symbud Myntri Rangbah kynthup u Deputy Commissioner Abhinav Kumar Singh, IAS, u Superintend of Police ba thymmai ka WJHD u Jagpal Singh Dhanoa, IPS, u CEM ka JHADC ma Thombor Shiwat, ki MDC, ki ophisar sorkar, u Waheh Shnong ka Lapangap ma Deimonmi Lyngdoh ha ryngkat ki paidbah nongshong shnong ka Lapangap bad ki shnong bamarjan.
Ha kane ka jingleit hiar u Symbud Myntri Rangbah haba ia kren bad ki paidbah ka shnong Lapangap, ula kular ban ai ka jingïada ba pura ïa ki paidbah nongshong shnong da kaba ong ‘wat tieng ngan trei shitom kum u MLA ka thaiñ’ ban wanrah ka jingsuk bad ban pynïoh ïa pud u sam u bapura. jong ka shnong.
U ma Dhar ula u la bthah ïa ki pulit kiba don ha kane ka jaka ‘ba kim dei ban kynriah katba ym pat ong da ka shnong, lada ïoh lad ngin nang pynbun shuh shuh ïa ki pulit ha shnong Lapangap’ ong shuh shuh u Symbud Myntri Rangbah.
Ula ong ba kane ka jingwan jong u ka long da kawei ka jingmut bad ka jingkitkhlieh ïa ki nongshong shnong ka Lapangap bad ia ka jait bynriew ba kim dei ban shah lehbeiñ ha kiwei pat, ka kam ia khajia pud ka shait jia ha kino kino ki por, kumta u kyntu ïa ki paidbah nongshong shnong ba kin pynbiang noh ïa ki kot ki sla ki jaka puta jong ki khnang ban pynsuk ïa ka Committee, ong u ma Sniawbha.
Shuh shuh ula ong haka kam pynbeit pud kam dei ban duh ïa ki mynsiem briew da ka jingïa umsnam bad mynta ka sngi nga la wan hiar khnang khnang sha kane ka jaka ban ïoh jingtip ïa ka jingeh jong ki paidbah ha Lapangap.
Ki jingïakhajia kiba la mih dang ha kine ki sngi bala dep u ong kaba nyngkong ka dei na ka daw ka jingwan thung dieng jong ka Assam ha lum Umchyrngan, Lapangap. Kaba ar ka long ka jingbym ïoh lad shuh ki nongrep ban leit sha ki hali ki pynthor. Halor kane ula kular mynta hi ka sngi ha ka por janmiet un leit ïakren ïa kine ki mat sha u Myntri Rangbah ka jylla da kaba kyntu ïa ki paidbah ban long kiba ïaishah.
‘Ka kam pud kam sam’ dei ka kam jong ka sorkar jylla ban pynbeit ym dei da u paidbah’, kumta ka sorkar kan ïaleh ban pynbeit kloi ïa kane ka kam. Ngi la dep phah leh ïa ka home work sha ki bor District ban kynthup ïa ki shnong na Khanduli, Psiar ter ter kiba don hapoh khappud hapoh 45 kilomiter shapoh bad 45 kilomiter shaneng na ka bynta ban wanrah sha ka sorkar jylla ban ïoh ïakren bad ka Assam ong u Symbud Myntri Rangbah haba kren ha ki paidbah nongshong shnong ka Lapangap bad ki shnong ba marjan.
