Hadien ka jingialang bad u Commissioner Secretary jong ka Tnad pule puthi u Vijay Kumar, hynne ka sngi ka19 Tarik Nailar 2024 ha Main Secretariat ki nongtrei SSA Non-Teaching Staffs ki la rai ban hun ia ka jingtyrwa ka Sorkar ban ap ia ka Rationalisation Committee ban pynbeit halor ka tulop ka ba ki dei ban ioh na ka sorkar.
Kum ban shu pynkynmaw, ka All Meghalaya SSA non teaching staff Association ka la sdang ia ka jingiakhih shong kyllaiñ myngngor, ha ka 31 tarik Naitung 2024, ha madan Malki na ka bynta ban dawa kyntiew tulop ia ki 1200 ngut ki nongtrei SSA.
Hadien ba mih na katei ka jingiakren (meeting) na ka liang ka President, ka Kong Jennyfer Synrem ka la ong wat la ka jingmih na ka jing ialang mynta ka sngi kam shym la long kaba pynhun ia baroh, hynrei na ka liang ki nongtrei SSA ki la rai ban mynjur noh ia ka jingtyrwa ka Sorkar, da ka ba ailad ia ka Commitee ban pynbeit halor ka tulop ki nongtrei SSA, da ka ba hun ruh ia ka jingkular ban ia kynduh biang hadien ka financial year khnang ban ioh ban bishar biang ia ka tulop hadien 5 snem.
Halor ka jingiakhih kaba la bteng mynta la 19 sngi ha Madan Malki, ka Association kan sa pynkut noh ynda la ioh ka jingthoh na ka Sorkar, pynshai ka President.
