Mynta ka sngi na ka liang ki bor pyniaid jong ka karkhana Meghalaya Cement Limited (MCL) Topcem lyngba ka Board of Directors, ki la shim ia ka rai ban weng kam noh shi syndon ia ki ar ngut ki nongtrei bar jylla kiba trei ha katei ka karkhana kiba kynthup ia u Arun Kejriwal bad u Umesh Kumar, kiba la donkti ban kynshoit bad pynshit ia ki Pulit ban shoh ban bom naphang ia ki paidbah ba pyrshah ia ka Public Hearing katei ka karkhana.
Kum ban shu pynkynmaw ba hadien ka jingjia ia huri hura ha Meghalaya Cement Limited (MCL) Topcem, halor ka jingthmu pynlong Public Hearing ba ka khot pynlong da ka Meghalaya State Pollution Control Board (MSPCB), ha katei ka karkhana na ka bynta ban pyniar ne pynbun ia ka jingpynmih dew bilat ha kane ka 24.08.2023, kala mih ka jinghuri hura kaba jur hapdeng ki Pulit ka bor District EJHD bad ki paidbah jong ki shnong ka thaiñ Narpuh kumjuh ruh ki sengbhalang, haka bun ki paidbah ki la shah sympat lathi bad shah shoh ha ki Pulit ha kane ka jingiakynad.
La paw ba la don ar ngut ki bar jylla kiba trei ha katei ka karkhana kiba la kynshoit ban pynshit ia ki Pulit ban shoh ban bom naphang ia ki paidbah kiba wan pyrshah ia katei ka Hearing. Kumta ha ka jingiadei bad kane na ka liang ki sengbhalang bapher bapher kumjuh ruh ki shnong ki la dawa ba dei ban weng bad beh kam syndon ia kitei ki ar ngut.