U Superintendent of Police, u Bah Sylvester Nongtnger haba kren sha kilad pathai khubor ha ka 10 Tarik Nailur 2024, u la iathuh ba na ka liang ka Tnad ka la dep ban weng kam shipor ia u Sub Inspector, Bah R Marwein ka Laban Police station halor ka jingjia ha Laban Police station kaba long kaei kaei ka jingjia ka bym lah ban pdiang.
Hadien ba la saphriang kawei ka video kaba la ring da ki katto katne ngut ki briew ki ba la leit sha Laban Police station ban ujor ejahar pyrshah ia uwei u nongniah kali u ba ktah kti ia kawei ka kynthei ha kane ka thaiñ, khlem da pynslem u SP u la shimkhia bad pynrem halor kane ka kam kaba la pynlehrain wat ia ka tnad pulit.
Katkum ka jingiathuh, utei u ophisar u la buaid bad kren heh ia ki nongwan ujor hynnin ka miet ka 9 tarik Nailur. Nalor kata u la pynksan bad kyntaid ruh ban register ia ka jingwan ujor jong ki khlem ka jingkheiñ snep ia ki nongshong shnong.
U Bah Nongtnger u la ong ruh ba “Na ka liang ka East Khasi Hill Police, kan ym lah ban pdiang ia kum kine ki jingleh na ki pulit bad u la ong ba kin shim da ki sienjam ba tyngeh ban pynshitom lada lap ba ki leh ia ka bym dei”.
U SP u la pyntip ba lada don biang kum kine ki jingjia nangne shakhmat dei ban pyntip ha u nombor 122. U la iathuh ruh ba ka Tnad pulit ka ju pynkup burom ia ki ophisar ki ba leh bha ia ka kam bad ki ju pynshitom ruh ia ki ba leh ia ka bym dei.