Ki nongtrei bylla sngi kiba shong ïakhih ha madan Malki ki la weng noh shipor ia ka jingiakhih namar ba dang don ka Dorbar mang tyngka jong ka sorkar Jylla.
Haba kren bad ki nongthoh khubor u Bah Ivan Blah u la ong, ka jingmih shakhmat ban ïakhih ka dei halor ka jingshah weng kam jong ki bad ki dawa na ka sorkar ban thung kam biang ia ki. Ka jingshong iakhih jong ki nongtrei bylla sngi ka la poi sha ka 4 sngi haduh mynta ka 3 tarik Lber 2025 naduh ba sdang ia ka jingiakhih kata ha ka 28 tarik Rymphang 2025 bad kat haduh mynta na ka liang ka Sorkar ka khlem shim kino kino ki sienjam haba iadei bad kine ki nongtrei bylla sngi kiba trei ha Secretariat kiba la shah weng kam kiba trei kum ki cleaner, peon, chowkidar bad ki don ruh napdeng kine ki nongtrei bylla sngi kiba la trei ia kane ka kam kumba 10 haduh 15 snem ei ei bad ki dawa na ki bor pyniaid ban thungkam biang ia ki.
Haba ia kren bad ki Nongthoh khubor na ka liang u bah Thomas Passah, Working President jong ka KHNAM u la ong ba na ka liang ka seng ka wan ban don bynta lang bad ban ai ka jingkyrshan ia ki ha kane ka jingiakhih.
U la ong ba kane ka jingshah weng kam ka jong ki, kiba la trei da ki phew phew snem bad kane kam dei ka kynhun ba nyngkong ban iakhih ba ki la shah beh kam da kiba bun ki kynhun ki la iakhih hadien ba ki shah beh kam noh wat hadien ba ki la ai ka jingshakri kaba da ki phew snem. Kane kam dei ka jingbakla jong ki, u la ong katkum ka jingsngewthuh ki la weng ia ki ban thung da ki wei pat, ka SAD ka dang don kam ia ka kam ka jong ki hynrei ki leh ia kane ban thung da kiba thymmai.
U la ong bun ki buh jingkylli ba ki la tip ba dei ka kam casual hynrei tang kane ka wei lada ka sorkar ka khot thung kam wat la ka dei ka post casual ruh baroh kin ia thep kin ym pyrkhat la kin shah beh ruh, baroh kin thep wat kito kiba thnum ruh ma ki ruh kin thep.
U la ong ba kane ka dei ka jingbym lah jong ka sorkar ban pynbiang ia ka recruitment policy, ka sorkar ka khot ia ki bad ki la trei da ki bun bun snem, lada ong shipor ki dei ba batai shai kein.
Shuh shuh la bynrap da kaba ong ba ka sorkar ka dei ban pyrkhat ia ki namar ki la ai ka jingshakri ia ka da ki phew phew snem.