U District Magistrate (DM) ka West Jaintia Hills District u Abhinav Kumar Singh, IAS, ula pynmih ia ka hukum mynta ka sngi ba la weng noh shisyndon ia ka jingpakhang miet (Night Curfew) hadien ba ka jingshong suk ha ki bynta jong ka Assam bad Meghalaya kala wan biang.
Ka hukum ba la pynmih mynta ka sngi kala weng shisyndon ia ka hukum kaba la dep ban pynmih ha ka 9 bad 14 tarik mynta u bnai halor ka jingpynjari Curfew miet ha ki bynta khappud ka Assam bad Meghalaya.
Hynrei ha kaba iadei bad ka shnong Lapangap bad ki thaiñ ba marjan u DM u la pyntip ba dang pyntreikam ia ka jingpakhang (Total Curfew) hapoh ka kyndon 13 BNSS, na ka bynta ban teh lakam ia ka shongsuk shongshngaiñ hapoh katei ka thaiñ.
Kumta kane ka hukum ka dang khang ia ka leit ka wan jong ki briew ha ki thaiñ Lapangap ka West Jaintia Hills District, la khang ia ka jingialum briew kaba palat ia ka 5 ngut bad la khang ruh ban rah ia kino kino ki tiar pynmynsaw.
Kane ka hukum kan treikam noh mardor naduh ba la pynmih ia ka mynta ka sngi tad haduh ban da pynmih da kawei pat pyntip u District Magistrate ka West Jaintia Hills.
