Ka Seiñraij Jowai sa shisien ka khot bad wer sngewbha ïa baroh sha ka ‘Shad Sukra’ ka ban sdang naduh ka 5-6 tarik Ïaïong, 2025, halor ka phang kaba ong (A Bei! A Bei!!, A Bei Rymaw – Ka Yi cha “Bei!”), Ka “Nongkylliang”.
Ka prokram jong ka Shad Sukra ha ka 6 tarik u Ïaïong, 2025 kan sdang ha Madan Ryngkaw Tpep-Pale ha kaba u symbud Myntri Rangbah ka sorkar jylla u bah Prestone Tynsong un long u kongsan ha ka jingdonlang ki nongïalam ñiam nalor kiwei de.
Ha madan Ryngkaw Tpep-Pale ki nongïashim bynta ha ki jingshad kin don haduh 17 tylli bud sa ka jingshad surok haduh ka Biar ka Blai bad yn don 3 tylli ki jingshad, nangta kan don sa ka jingïamih ïew sha Iawmusiang ha kaba yn don haduh 14 tylli ki jingshad ban shim bynta lang na ki seng bapher bapher bad u MLA ka Jowai ma Wailadmiki Shylla un long u Kongsan.
“Ka jingwan ki nongïashim ha ka Shad Sukra katba dang mih ki snem kila nangbuh nangbuh, ong ki nongïalang ka Seiñraij Jowai bad ka jingpynlong ïa ka, ka long halor ka nongrim hashwa ban leit hiar rep sha ki hali ki pynthor, khnang ban dap u synbai u phniang ha baroh shisnem.
Halor kane u President ka Seiñraij Jowai ma Hercules Toi u khot sngewbha ïa baroh ki khun ka Niam tre bad ïa kiwei ki riewngeit napoh ka Ri Khasi Jaiñtia ba kin wan sha kane ka Shad Sukra khnang ba yn lah ban pynlong ïa ka, kaba phuh ba phieng.
U General Secretary ka Seiñraij Jowai ma Arwotki Sumer u ong ka Shad Sukra ka dei ka shad niam kaba ki khun ka Niamtre ki pynpaw ka jingsngew burom ïa ka jingkyrkhu ba la ïoh na ka mei ryngaw naduh ka bam ka dih bad ka kup ka phong, ïa kane la leh naduh ki por mynshwa, hashwa ban thung ban tep.
Shuh shuh ula ong ba ka seng kam nym pdiang ïa kino kino kiba kren pyrshah ïa ka niam ka rukom, namar ïa ka Shad Sukra la leh naka bynta ban burom ïaka mei mariang kaba long ka nongpyndap pynbiang.
U Asst. General Secretary ma Wyraiki Kharbuki ula ong ïa ka Shad Sukra la pynim biang ha u snem 2006 bad haduh mynta kala long kaba phuh ba phieng da kaba pynlong ka jingmih ïew ha madan Shad Sukra kaba don ha Iawmusiang ha ryngkat ka shad ka kmen bad ka tem ka put.
Kum ki khun ka bri u Hynñiew Trep Hynñiew Skum ki dei ban sngewthuh ïa ka jingkordor kaba la buh da uba rim ba jah, halor ka riti ka dustur kaba pyni ïa ka dak ba ka ri bad ka jaitbynriew ka dang im, ula ong hadien ka jingpynshai jong kiba kren pyrshah, ka seng ka pdiang ïa kane halor ka jingsngewthuh jong ki ïa ki jingbakla.
Ka Prokram ha ka jainmiet jong ka 5 tarik u Ïaïong kan don ka Drama kaba kyrteng “Thijchwa”.