U President ka All Khasi Meghalaya Tourist Taxi Association (AKMTTA), u Bah Ricaldinius Dohling, u la ong ba lada ka Sorkar jylla ka lah ban weng ia ka jingeh jong ki nongñiah kali Tourists ha ka jylla Meghalaya, ki nongñiah kali ki lah ban pynbiang ia ki kali Tourist ym tang 3000 hynrei 4000 tylli ruh ki ban ialamkai ia ki nongwan jngohkai Pyrthei ki ba wan sha ka jylla Meghalaya.
Lah ban kdew hangne ba na ka liang ka All Khasi Meghalaya Tourist Taxi Association ha ka 9 Tarik Nailur 2024 kala sdang ia ka jingiakhih jong ka da kaba pynlong ia ka ‘Black Flag Week’ ne ka jingwah lama ïong baroh shi taiew, ban pyrshah jur ia ka jingiohlad ki kali kiba nabar ka jylla ban kamai ha kylleng ki jaka jngohkai kiba don ha ka jylla Meghalaya.
Haba kren halor ka jingiakhih, u Bah Dohling u la ong ba “Ka jingiakhih jong ngi ia kaba la khot ka Black Flag week kaba la sdang naduh ka 9 Tarik, kan kut ha ka 14 Tarik Nailur 2024, bad ka sienjam ban iakhih ka long hadien ba ka sorkar kam shem la khot ia ngi ban iakren halor ka jingeh kaba ngi mad”.
U la bynrap “Na ka liang ka Association ha ki sngi ba la dep ka la leit ban buh da ki shithi sha ka Sorkar ban kyrpad ban khot da ka jingialang khang ba kin ioh ban pynsngew ia ki jingeh jong ki hynrei haduh mynta ka Sorkar ka shu sngap mynthi, kaba pynlong ia ngi ba ngin sdang da ka jingiakhih kaba jaijai” .
U Bah Dohling u la ong ruh ba halor ka jingong u Myntri ka Tnad Tourism ba ki Association jong ki Tourist Taxi kim iatylli, u la ong ba ia kane ngin sa jubab ynda la kut kane ka jingiakhih Black Flag week, ka ban long ha ka 14 Tarik Nailur 2024.
Halor ka jingkam u Bah Paul Lyngdoh ba ka jylla ka duna haduh 3000 tylli ki kali Tourist, u la pynphai da kaba ong, ba la buh da ka jingkylli ba 3000 tylli duna kali Tourist ne 3000 ngut ki samla Khasi ki hap ban shu shong sngi bym ioh kamai? Da ka ba ong ruh ba lada ka Sorkar ka pynbeit ia kane ka jingeh ki nongñiah kali Tourists ha ka jylla, ka Association kan pynbiang ym tang 3000 tylli ki kali Tourist ki ba duna hynrei haduh 4000 tylli kan pynbiang ia ki Tourist Taxi na ka bynta ki nongjngohkai Pyrthei ki ba nabar jylla.