Ka Khasi Student Union (KSU) Namdong Area Unit, hadien ka jingioh jingujor naki paidbah kiba leit shim dawai leit donkam ha ka Community Health Center (CHC) Namdong, West Jaiñtia Hills District, halor ka jingbym wan tista bad wan biang por ki nongtrei ne ki staff jong kane ka jaka ai dawai, mynta ka sngi ka 4 Naitung 2023, ka seng ka la leit jurip hi dalade bad la lap iaki jing shisha ba bun naki nongtrei ki bym wan tista bad ki ba wan ruh kim wan haka por kaba biang, ha kaba wat haduh 11 ne 11:30 mynstep ruh ym pat don nongtrei bad ki mih trei ne leit phai pat kumba 2 lane 3:00 janmiet.
Na ka liang ki nongialam ka KSU Namdong Area Unit, u Juhhi Tariang General Secretary, ha ka jingiadonlang u Samla Kitboklang Lamare President, samla Chanbor War President Nartiang Circle lem bad ki dkhot hadien ka jingjurip, kila ong ba kane ka jingleh bym suidñiew jong ki nongtrei ka CHC Namadong, ka long kaba ym lah ban pdiang satia bad lada kumne ka rukom wan trei slem bad leit phai kloi ka jong ki, kumno kin lah ban ai ka jingshakri ia u paidbah kane ka thaiñ kaba don da ki phew tylli ki shnong bad da ki phew hajar ngut ki briew.
Shuh shuh ha ka jingiadei bad ka jingbym poi biang por jong nongtrei kane ka CHC, ka kyrpad jur ia ki bor ba dei peit ban leh ia kaba donkam halor kane ka kam, lym kumta ka seng kan shim da kiwei pat ki sien jam kiba tyngeh.