ka Voice of the People Party (VPP) mynta ka sngi ka 7 tarik Risaw hapoh ka jingialam jong u Bah Brightstar Marbaniang, MLA ryngkat ki nongkitkam ka Party ki la leit ia kynduh ia u Commissioner jong tnad pule ka jylla u VK Mantri ban dawa halor ka jingeh jong ki nonghikai college.
Haba ai jingkren ha kane ka sngi na ka liang u Bah Brightstar Marbaniang u la ong ka jingwan kynduh jong ia u Commissioner ka tnad pule puthi ka jylla ka dei halor ka mat ba nyngkong ka jingbym biang por na ka liang ka sorkar ha kaba ai ia ka jingiarap pisa ia ki nonghikai kiba la shongthait bad kiba la khlad noh kumba shiphew lak ka ba sngewlyngoh pat ka long don ki nonghikai kiba la shongthait mynta la 4 snem kim pat ioh ia kata ka jingiarap pisa na ka sorkar.
Ha kawei ka liang u la pynpaw don pat ki nonghikai ki ba mar sien shongthait ki la ioh ia ka jingiarap pisa na ka sorkar balei ban niew shiliang khmat ia kiba mon ki ai ia kiba bym mon ki khlem ai kane ka dei ka mat kaba na ka liang jong nga kum u MLA nga la dep ban rah ha ïing dorbar hynrei na ka liang u myntri rangbah u la ong ba yn sa shim khia haba iadei bad kane ka mat hynrei haduh mynta ym shym leh ei ei ngim banse ban iakynduh ia u Commissioner ka tnad pule puthi ban pynbeit ia kane ka mat ym dei ban niew shiliang khmat.
Ka mat kaba ar ka dei halor ka jingthung kam ia ki nonghikai hapoh college katkum ki advertisement ki ioh ha UGC Pay Scale hynrei ki don ki nonghikai haduh kat mynta ki ioh ha ka state scale ia kane ka mat ruh ngi lah iakren bad u commissioner ban pynbeit bad bishar bniah ha kane ka bynta.
Ka mat kaba lai ka dei halor ki nonghikai kiba pyndep ia ki PhD bad ki dei ban ioh ia ka bhah haba ki pyndep ia ki jingpule ba kham shajrong hynrei mynta kane kam don shuh ki la pynpaw ha u commissioner ban kit khia ia kane ka mat ruh.
Ka mat kaba khatduh ka dei halor ka rta thung kam ia ki nonghikai katkum ka UGC regulation kam don kano kano ka rta kino kino ki lah ban thep ia ka kam nonghikai ha UGC. Ka sorkar ka kwah ban kyntiew ia ka pule puthi hynrei ia ki nonghikai pat ka buh kyndon ha ka rta na bynta ki nonghikai ban kyntiew ia ka pule ha ka jylla kane ka long da khongpong ia ka jingleh ka sorkar. Lada ngi peit ia ka kam hikai ha college ki don shibun ki qualification lada ngi peit ia ki nonghikai kiba hikai ha ki skul bad ki higher secondary ki don la ka jong ka jong ka qualification. Haba iadei bad rta pat ki shim kajuh kata 27 snem kane ka bym lah ban long.
Ngi lah iakren ia kane bad u commissioner ban peit bniah bad pynbeit ia kine baroh.
Na ka liang u Bah Brightstar Marbaniang u pynpaw ba ka jingiakynduh ia u Commissioner ka long kaba sngewtynnad bad u ai khublei ia ka seng VPP kaba la wanrah ia kine ki mat haba iadei bad ki jingeh jong ki nonghikai bad na ka liang u Commissioner ka tnad pule puthi u pynpaw ba yn sa ai ka jubab ha ki kyndiat sngi haba iadei bad kine ki jingeh jong ki nonghikai.