Ka Kur Sumer Jowai ha kane ka sngi saitjaiñ ka la pynlong ia ka jingialang paidbah ha Yungwalieh ka Shnong Panaliar, Jowai ha ka por 1:00Pm. Ha kane ka jingialang la pyllait paidbah ruh ia ka Kot Thup Sahkynmaw (Souvenir) jong ka kur da u Kñi Rangbahduh ka Kur u ma S. Quotient Sumer kum u Kongsan.
Ia ka jingialang la pyniaid da u Jait Dao Sumer bad la ioh ruh ka jingkren na ka longkmie, kong Tilneh Sumer, u Kñi ka Kur Rangbah Hamkom Sumer bad ki kyntien ai Khublei la ai da u Dayooki Sumer, Secretary ka Kur.
Ha shuwa ban sdang ia ka jingialang, u Rangbah Maham Sing Sumer u la ai ki kyntien ainguh ia u Blei bud sa ka jingot ia u Cake bad la ioh ruh ia ka jingrwai pdiang burom da ki Longkmie ka kur.
U ma Hamkom Sumer, ha ka jingkren ka jong u, u la batai lyngkot shaphang ka kur naduh ba ka sdang ban wan soh shnong sha Jowai bad u la ong ruh ba mynta hi, ka long ka ei kaei kaba sngewtynnad ban iathuh ba ki jaka jong ka kur baroh ki la long kiba skhem da ka jingiarap jong ki Dolloi naduh u (L) Laian Kynjiñ, (L) K. Comet Rymbai bad u ba mynta, ma Puramon Kynjiñ, u la ai ka jingiaroh ruh ia u MDC ka Jowai South, ma Saron Pasweth ba ha kapor ba lyngkot u dang shu sdang ban long MDC, u la ai jingiarap sha ka kur ban shna fencing ia kawei na ki jaka jong ka kur.
La ioh ruh ka jingbatai shaphang kumno la sdang ban pynmih ia ka kot thup sahkynmaw da u Secretary ka Souvenir Committee u ba long ruh u chairman, ma Jait Dao Sumer ha kaba u la iathuh ba naduh ka snem 2014 lawan ka jingpyrkhat ban pynurlong ia kane ka sngi, hynrei ki don shibun ki jingeh ban ioh lum iohlang ia ki jingtip ba bniah na ka bynta ka kur. Ki snem ki iaid, ka wan sa ka khlam Corona bad haduh mynta laioh ban pyndep ia ka kam, u la ai khublei ia kiba iadonkti ha kaba pynmih ia kane ka kot, ban pynshong pynthiah ia ka bad ruh kiba ai ia ka jingtip ba u laioh ban thoh bad pynmih, wat ha pdeng ka jingduna hangne hangtai.
Ha ka jingkren lyngkot jong u Kongsan, Rangbah S. Quotient Sumer, u la ong, ia baroh ki jingthaw ha pyrthei, ngi don la ka jong ka bynta la ngi don ha kano kano ka rukom im, ym dei ban klet ia la ka jong ka kmie, kaba ai ha ngi ka jait ka kynja; ngi dei ban burom ia ka iing, kaba dei ka jingkyrkhu jong u Blei trai Kynrad.
U la kyntu ia ki dkhot jong ka kur baroh ban tip ia la ka jong, ka akor ka burom bad ban rah ia ka nam jong ka kur shalor. “Na khyndaw hadooh bneiñ, da ka hukum ya i, dabooh daseiñ” u la ong, u ainguh ia u Blei ba u lam lynti ia ki samla ka kur ba ki lah ban pyndep ia kane ka kam kaba ma ki, kum ki Rangbah jong ka Kur ki la thrang dik dik ban leh ia ka.
