[La dep mang 70 lak tyngka bad shen yn sa sdang ka jingmaramot: MLA Jowai] –
Kawei na ki kynhun pynidohksah jong ka Ri-Lum Jaiñtia kaba la tip kum ka ‘Jaiñtia Body Building & Fitness Association’ (JBB&FA) da ka jingthmu ban wanrah ïa ka jingbha jingmiat ïa ka District hi baroh kawei, kala leit ban aiti syndon da ka dorkhas ha u MLA ka 2-Jowai Constituency ma Wailadmiki Shylla mynta ka sngi ha nongbah Jowai ban dawa maramot noh ïa ki jingdonkam jong ka District Library Auditorium kaba don ha Mynthong Jowai.
Na ka liang ka JBB&FA ka la leit aiti ïa katei ka Dorkhas ha ka jingdonlang u Deputy Commissioner ka WJHD bah Garod L.S.N Dykes, hapoh ka jingïalamkhmat u President ka Jaiñtia Body Building & Fitness Association (JBB&FA) samla Yoosar Kynjing, u Chairman ka Bouncers Association of Meghalaya Jaiñtia Hills u ma R.G. Sukhlaiñ bad u General Secretary ka BAMJH ma Ram Passah.
Katkum katei ka dorkhas la dawa ban maramot noh mar mar ïa katei ka Auditorium, namar kumba long mynta kane ka Auditorium kala don shibun ki jingduna ha ka por ba pynlong ïa ki prokram bapher bapaher bad kane ka la buh jingeh ïa kiba nongpynïaid prokram lada ki donkam ban pynlong hapoh ka District Library Auditorium, Jowai.
Ha kine ki sngi ba la dep ka ‘Jaiñtia Body Building & Fitness Association’ (JBB&FA) ka la pynlong ïa ka rynsan pyni dohksah kaba la tip kum 1st All Meghalaya Amateur Body Building Champion, Mr. Ironman Amateur 2021 ha u bnai Nohprah jong ka snem 2021, hynrei napdeng ki nongwan ïashim bynta ki don kiba wan nabar jong ka District bad kala long pynban ka jingilehraiñ shisha haba kiba nabar ki ïohi ïa ka jingduna shaba palat kane ka Auditorium naduh ki karma ban khreh ban khrum, ki jaka leit bar, ki jaka pynieng kali, wat ki jaka shong paidbah bun kiba la sniew lut.
Ka JBB&FA kala dawa jur na u MLA ba un shimkhia ïa kane ka kam ban wad ki lad ki lynti ban pynïoh jingïarap ha ka ban pynshna pynbha noh ïa ka katkum ki jingdonkam jong ka por ba mynta.
Kumba long mynta la i donkam shisha ban maramot noh ïa ka District Library Auditorium, Mynthong Jowai kynthup ïa ka jingai rong nalor kiwei de ki jingdonkam ba dei ban pynbiang ong ka JBB&FA. Lada lah ban pynitynnad ban pynbha ïa kane ka jaka kan sa lah ban khring ïa shibun ki nongwanpeitkai bad khamtam ïa ka sor Jowai hi baroh kawei.
La ïathuh ba haduh mynta ym shem la don kiba ïohi ne shimkhia ïa ka jingdonkam jong katei ka Auditoruim ha Jowai, wat na ka liang ka sorkar na ka por sha ka por ka ju pynlong ïa kiba bun ki prokram ha katei ka jaka, la ong shuh shuh ka seng.
Na ka liang jong u ma Wailadmiki Shylla MLA ula pynsngew ha ki nongïalam ka JBB&FA ba ka sorkar kala dep ban mang pisa haduh 70 lak tyngka na ka bynta ban pynbha pynmiat ïa katei ka District Library Auditorium ha Jowai bad u kyrmen ba ha kine ki sngi ban wan yn sa lah ban pyntreikam noh ïa katei ka pisa ba la dep ban mang.
