Ka Elaka Nartiang Welfare Organisation (ENWO) ha ka jingialang jong ka hynne ka sngi 22/01/2022 ha Nongkhroh, hapoh ka jingpyniaid u Chairman ka 4 Shnong ma Aldrin Dkhar kala pynrem jur ia ka jingleh donbor ka Jowai Municipal Board (JMB) Jowai ban leit bret ñiut (noh jakhliah) ha shnong Thadmusem khlem ka jingtip ki nongshong shnong ka 4 Shnong kiba kynthup ia ka shnong Sohphoh, Nongkhroh, Thadmusem bad ka shnong Larnai.
Baroh ki nongkren ha kane ka jingialang pyrshah ia ka jingleit noh jhep ka Municipal Jowai ha Thadmusem kiba kynthup ia u President ka Elaka Nartiang Welfare Organisation ma Katdangbiang Lamare, President ka HITO ma Romio Nongspung, Advicer ka JSM ma S.Barmaiñ, kong Lina Nongrum, kong Nisila Marboh bad kiwei de ki nongkren, kila pyrshah jur ia kane ka jingbriet ñiut ka JMB ha Thadmusem bad kyntu ia ki bor ba dei peit ban sangeh shisiendon bad lada ka JMB kam sangeh ka Elaka Nartiang Welfare Organisation, ki paidbah nongshong shnong ki 4 shnong, ki sengbhalang bad ka Elaka Nartiang hi baroh kawei kin pynlong ka jingiakhih pyrshah kaba tyngeh.
Ka jingialang ka pan jingpynshai na ki Waheh Shnong ka Sohphoh, Nongkhroh, Larnai, Thadmusem bad na u President Wahumngi 4 Shnong halor kane ka jingleit noh jhep ka JMB ha Thadmusem khlem ka jingtip u Chairman ka 4 shnong bad ki nongshong shnong.
Ha ka juh ka por ka jingialang kala kyntu ia u ma Sniawbhalang Dhar MLA ka thaiñ bad u Myntri ba dei peit ia ka Municipal ban pynsangeh shisiendon ia kane ka jingwan bret jakhlia ka JMB ha Thadmusem, khnang ban lait na kano kano ka huri hura bad kaba ktah ia ka burom ia ijot jong u kum u nongmihkhmat ka thaiñ pynkut ka kyrwoh kaba la phah da u ma Katbanbiang Lamare President ka Elaka Nartiang Welfare Organisation.