Ka Jaiñtia Students’ Union (JSU) Jowai Circle mynta ka sngi hadien ba la ïoh ïa ka jingujor na kiba bun ba lang halor ka jingbymdon nonghikai la hynriew (6) bnai kynthih, haki ar tylli ki subject kata ha ka Biology bad ka Environment Science jong ka Science Stream ha Govt. Girls Higher Secondary School Jowai.
Ka seng ha ka jingleit ïa kynduh bad ka Vice Principal, kala ïathuh ba ki ladep phah jingthoh bunsien sha u Director of School Education and Literacy hynrei haduh mynta kim pat ïoh ïa ka jubab halor kane.
Halor kane ka seng ka pynpaw ka jingsngew diaw shi katdei eh halor ka jingleh mynthi jong ka tnad pule (Education Department) ka sorkar jylla nalor ba la jan exam ki khynnah pule sa tang shibnai naduh mynta la ong ka seng.
Ka seng kala pynrem jur ba kane ka Sorkar jylla ka heh tang ki kular ha ki lad pathai khubor ba ka Tnat pule ka long kaba shimkhia bha ha ka jingïadei bad ka pule puthi ha ka jylla hynrei lada wad bniah ïa ka jingshisha kam pat biang satia kumba kila pynpaw ba ki la pynlut da ki klur ha ka pule puthi.
Shuh shuh ka seng kala kyntu jur ïa ka Directorate of School Education and Literacy ba kan shim khia mardor ïa kane da kaba pynïoh nonghikai hapoh shi taïew ïa ka Govt Girls Higher Secondary School Jowai khnang ba kan ym ktah ïa ka samla pule jong ki khynnah. Ka Jaiñtia Students’ Union (JSU) Jowai Circle kala kren shai lym kumta kim banse ban ïaid da kawei ka lynti kaba kham tyngeh, la pynkut ka kyrwoh na u President ka Jowai Circle u samla Borntifulson Rupon.