Ka Awaken India Movement (AIM) hynne ka sngi ka 9 tarik u Ìaìong kala pynlong ia ka jingialang paidbah hakhmat u mot Kiang Nangbah ban pynpaw ka jingpyrshah ia ka sorkar halor ka jingpynbor ia ki paidbah ban pynrung kyrteng addhar, hadien kila mut ban tur paidbah sha secretariat da ka jingthmu ban iakynduh ia u Myntri Rangbah ka jylla u Conrad Sangma bad kila shah khang lynti ha ki bor Pulit ha kaba kala mih ka jingiatan ia patrong kaba jur.
Hadien ka jingiakren kaba la neh katto katne por na ka liang ki bor District kila pyntip sha ki nongialam jong ka AIM ba kim lah ban iakynduh ia u Myntri Rangbah ka jylla ne ia u Chief Secretary namar ba kim don ha Shillong bad hadien kila ioh ban iakynduh noh ia ka Deputy Commissioner, ka East khasi Hills ka kong R M Kurbah ban aiti ia ka dorkhas.
Haba kren sha ki lad pathai khubor na ka liang u Bah Banshai Marbaniang hadien ba la dep iakynduh ia ka Deputy Commissioner ka Kong RM Kurbah u la ong wat pynbor ia ki paidbah ban leh ai u Addhaar ai ba kin jied hi ha ka mon laitluid, u la ong ba bun ki paidbah ki la iohi ia ka jingkren u Myntri ba deit peit ia ki thaiñ nongkyndong ba ki paidbah ki la sngewsih sngew diaw ba ka sorkar kan pynduh noh ia u khaw Rashon, ym tang u khaw rashon ki paidbah ki shah pynduh haduh ka pule ka puthi, ka Scholarship, ki health Service kum ki insurance, ki don ruh ki Age pension ki shah pynduh ne ki bai bam tymmen bad don ruh ki paidbah ki shah pynduh namar bym don ia u Addhaar ki hap resign ia ka kam.
Shuh shuh u la ong ba na ka liang ka kynhun ka burom ia ka rai jong ka Supreme court ha kaba ka Jylla kum ka Jammu Kashmir, ka Meghalaya bad ka Assam kin kham long pher bad ka Exemption ka dei ban don ia kine ki lai tylli ki Jylla, khamtam ia ka Jylla Meghalaya kiba dang im kum ki Jaitbynriew rit paid. U la ong ruh bun na ki nongmihkhmat ki wan shakhmat ban kyrpad ia ki paidbah ban jied ia ki kum ki nongmihkhmat ban long u shakri bad ki ong ba ki ieid Jaitbynriew, hynrei mynta ki paidbah ki jawumat tang ban ioh jingmyntoi na ka Sorkar tang namar ba kim don ia u Addhaar bad um don uwei ruh ba kin kren na ka bynta ka hok jong ki paidbah.
Shuh shuh u la bynrap ki paidbah ki shah pynbiej ha ki Politcian bad kita ki politician kiba thaw ia ki party ki pynbiej ia ki paidbah laiphew jait, ynda la dep Elekshon ki paidbah ki iam ki iakynduh ha ki jingeh namar ia ka mon ba laitluid jong u briew la shah pynthut noh ha ka sorkar.