Mynta ka sngi u symbud myntri rangbah ka Jylla u ma Sniawbhalang Dhar mynta ka janmiet u la wan ïa kynduh ïa ki MDC bad officer jong ka Jaintia Hills Autonomous District Council (JHADC) bad pynlong ïa ka jingïalang, na ka bynta ban ïakren bad bud dien ïa shibun ki kam bapher bapher jong ka Council bad khamtam ha kaba ïadei ba ka tulop jong ki nongtrei ka bad kumjuh ïa ka jingtei jong ka Iawmusiang Supper Complex, Jowai kaba la sah kut ka jingpyntrei da ki phew snem mynta.
Hadien ba la wai ka jingïalang, na ka liang u ma Sniawbhalang haba kren sha ki lad pathai khubor u la ong ba ka dei kaba donkam ban pynlong ïa kum kine ki jingïakynduh ïa ki MDC bad nongtrei ka Council khamtam kum u symbud myntri ka sorkar u ba mihkhmat na kane ka District.
Ha ka jingïadei bad ka tulop jong ki nongtrei ka JHADC, u ma Dhar u la ong na ka liang jong ki kum ka sorkar ki la pyrshang ban siew pyndep noh ïa ka tulop kaba dang sah, da kaba wad ki lad kumno ban kyntiew ïa ka jinglum khajna (revenue) na ki shnat ne sector bapher bapher ki bym ktah pat ïa ki riew paidbah. Katba ïa ka por ym pat lah ban ong lano ka sorkar kan pyllait ïa ka tulop hynrei na ka liang ka Sorkar kan pynkloi katba lah na ka bynta ban siew noh ïa ka tulop jong ki nongtrei ka Council ula ong shuh shuh.
Kawei pat ka mat ïa kren jong kane ka jingïalang mynta ka janmiet ka dei halor ka jingtei (Building) jong ka Iawmmusiang Supper Complex, ha kaba u ma Dhar u la ong ba marsien kut kane ka Election ba la dep ka Sorkar kala ïa shong Committee ryngkat ki ophisar ban pyrkhat ïa kane ka kam. Kumba long mynta ka jingpynkhreh ïa ka Balance DPR ka la sdang bad ïaid shakhmat. Namar ka jingsah slem palat ka jingpyntrei ïa katei ka Buildieng kumta ka sorkar kala sngewdonkam ban pynlong shwa da ka jingjurip jong ki riew shemphang (Experts) bad mar sien dep ïa kata bad hadien ba la submit ïa ka DPR yn sa lah ban sdang biang ka jingpyntrei.
Ha kane ka jingïalang na ka liang u CEM JHADC u ma Thombor Shiwat u la aiti ruh ïa ka Memorandum kaba ïa dei bad ki jingdonkam bapher bapher jong ka Council ha u Deputy Chief Minister u ma Snaiwbhalang Dhar.