Ka jingpan NOC jong ki bor pyniaid District ka West Jaintia Hills na ka Elaka Satpator ha kaba iadei bad ka jingthmu ban sdang noh ia ka jingpyntrei ia ka jingker sainar shiah ha khappud bad ka ri Bangladesh ha ki thaiñ jong ka Elaka Satpator ka dang sah teng shwa, namar ba ym pat lah ban shim ia ka rai.
Mynta ka sngi na ka liang jong ki nongrep kiba don ha khappud bad ka ri Bangladesh kila pynlong ïa ka jingïamir jingmut ha ryngkat bad ki ophisar jong ki bor pynïaid District ka West Jaiñtia Hills kaba la long ha Hall jong ka Muktapur Govt. L.P School Muktapur hadien ka jingpan NOC ka ophis u Deputy Commissioner na ka Elaka Satpator Dolloiship ban sdang ïa ka jingker Sainar shiah (Border Fencing) na Muktapur haduh Jaliakhola kaba kynthup ïa u mawpud (Border Pillar) BP No 1283/7s haduh BP No 1301/4s da kaba ieh ïa ki jaka kiba don kumba 150 Yard na ka jaka ba ker Sainar Shiah.
Ïa ka jingïalang ha kane ka sngi la pynïaid da u ma Kolmen Pohshna uba dei ruh u Adviser ka Synjuk ki Waheh Shnong War Jaiñtia ha ka jingdonlang naduh u Deputy Commissioner ka West Jaiñtia Hills District u bah B.S. Sohliya, IAS, u ma Mark Andrew Challam, MCS Addl. Deputy Commissioner, u Dolloi ka Elaka Satpator ma Daman Lakashiang, ki nongrep ka thaiñ, ki nongïalam ka Co-Ordination Committee on International Border (CCIB), ki sengbhalang kynthup ïa ka KSU, FKJGP bad ka HNYF.
Na ka liang u Dolloi ka Elaka Satpator ma Lakashiang haba kren sha ki lad pathai khubor hadien jong ka jingïalang ula pyntip ba ka jingïalang kala rai ba ïa kane ka jingpan NOC na ka ophis u DC ban ker sainar shiah (Border Fencing) ym pat lah ban ai katba ym pat lah ban pynbeit ïa u pud u sam katkum ka jingdawa jong ki paidbah nongrep ka Elaka kiba don ha kitei ki thaiñ Khappud.
