Ka jingialang kaba la long mynta ka sngi hapdeng u Deputy Commissioner ka West Jaintia Hills District, ki briew jong ka NHAI ryngkat ka seng Jaintia Student Movement (JSM), ka seng ki nongniah kali kamai ha ri lum Jaintia bad ki nongialam shnong ka Ialong, kam shym la long kaba seisoh seisla.
Na ka liang ki nongialam sengbhalang (JSM) bad ka seng ki trai bad nongniah kali kamai kila pynpaw ba hadien ba kala mih ka jingkynrum kynra ha ka 14 tarik mynta u bnai na ka daw jong ka jingshim kabu palat jong ki nongtrei ka Toll Gate kaba don ha Ialong kiba la shim haduh Rs.60 tyngka kawei ka kali na kaba ju shim Rs. 30 tyngka. Na ka liang jong u DC pat mynta ka sngi ula khot ia ka jingialang hapdeng kine ki seng bad ki nongtrei jong ka NHAI ryngkat bad ki nongialam shnong ka Ialong kaba la long ha DC Conference Room.
Ka jingiakren ha kane ka sngi kam poi shano shano ruh bad ym pat lah ban shim ia ka rai. Na ka liang jong kine ki seng ki ban jur ruh ba ka NHAI ka dei ban pyllait khajna syndon ia baroh ki kali jong ki trai ri kane ka thain. Kumta na ka liang jong ki nongialam ka JSM bad ki nongialam jong ki Tourist Association kila pynpaw ba katba ym pat lah ban ia pynbeit ia kane ka jingeh baroh ki kali trai ri jong kane ka thaiñ kin iaid beit khlem kano kano ka jingsiew khajna sha katei ka Toll Gate.
Kumta kila kyntu ia baroh ki paidbah naduh ki nongniah kali shimet, ki Tourist bad ki Local ba kim dei satia ban siew pisa ha katei ka Toll Gate katba ym pat lah ban pynbeit ia kine ki jingeh.
