Ka Jaiñtia National Council (JNC), ka pynpaw ïa ka jingbym sngewiahap ha kaba ïadei bad ka tulop jong ki lai tylli ki Autonomous District Council, kiba dei ban bei pisa da ka sorkar jylla. Ka Seng ka la iohi ba u Myntri Rangbah ka jylla u Conrad Sangma u la pynbna dang shen, ba ka Sorkar Meghalaya kan siew hi noh ia ka tulop ki nongtrei jong ki Autonomous District Council (ADC).
Kane ka jingleh jong ka sorkar Jylla ka long kaba biang ne em, ne kaba hap ban ia tai bha, pynpaw ka JNC.
Ka seng ka la ong ba, ha shwa ba shim ia kane ka rai jong ka sorkar, la donkam ban pan jingshai halor kine ki bynta kiba long kongsan.
Ha kano ka paragraph jong ka Sixth Schedule ka ai bor ia ka sorkar ba ka lah ban siew ia ka tulop ki nongtrei ki ADC? Namar kat kum ka Sixth Schedule kam don ka provision ba ka sorkar kan siew tulop ia ki nongtrei (Employees) jong ka council. Hato kane kan ieng ha khmat ka ain?
Kan jia aiu ia ka bor ba laitluid jong ki ADC (Autonomy Power of the ADC). Hato kane kan nym pyntroiñ (Dilute) noh ia ki bor jong ki ADC? Hato ka state kan nym tular ia ki kam ki ADC lyngba ki nongtrei, ki nongtrei ki ADC kin sa long answerable sha ka state ne sha ka council? Ki jingthung kam thymmai ha ki ADC (New Appointment) hap ioh approval ne em na ka state? Lada ka state ka siew tulop sa ia ki members hato ki MDC ki la long ki office & profit jong ka state?
Ia kane ka tulop la kin ot bad khate ne em na ka share ki ADC kum na ki Mineral, Transport & Forest? Hato ka jinglum ia ka Professional tax, ka State kan dang ai ne em ia ka bha sha ki ADC? Kaba kham kongsan eh ka long ba nangno ka sorkar jylla kan ioh pisa ban pyndap ia ka tulop jong baroh lai tylli ki ADC?
Na ka liang ka JNC ka sngewdonkam ban ai jingmut sha ki ADC ba ki dei ban pynkhlain ia ka fund la jong, khnang ba kan nym jia shuh nangne shakhmat ha ka kam pisa pilain. Ki ADC kim dei ban thung kam palat ia kaba ki lah ban siew.
Ka State Government ka dei ban ai jingkheiñ kaba biang (Proper & Detail Explanation), katno ka lum khajna na ki Mineral, Transport & Forest. Ka dei ban shai katno ka share ki ADC bad katno jong ka State bad ka State ka dei ban ai sha ki ADC ia ka share khlem da pynslem bad khlem khate.
Kane ka long katkum ka kyrwoh na u President rangbah ka JNC-CEC bah Sambormi Lyngdoh.
