Ka Jaiñtia National Council (JNC) Central Executive Committee haka kyrwoh na u Publicity Secretary sengkmie u bah Mebanteilang Sukhlaiñ kam shym sngewiahap tang khyndiat ruh halor ka jingkren thamula u myntri ka Food and Civil Supplies u ma Comingone Ymbon ba ka jingkiew dor ki mar bam ka dei naka jingbymdon lynti rel. Ka seng ka buh ka jingkylli ia une u minister hato lada ym don lynti rel ka mut baki mar bam kin shu iai kiew beit kumne?. Ka seng ka suba jur ruh ba ioh don kaei re kaei sha lyndet kaba ka sorkar ka thmu ban leh haba shim na kito ki jingkren jong u myntri.
Kum ban shu pynkynmaw ba ka seng naduh ki por ba mynshwa ka juh maham tyngeh ban wanrah lynti rel ha Jaiñtia Hills namar tang kito ki kharkhana balah don lypa ruh kim lah ban ai ka jingshakri kaba biang ne ka jingmyntoi iaki nongshong shnong ka thaiñ, sa ka lynti rel pat ym tip shuh shano kan ialam bad kaei ban sa jia, nalor ki aiñ ruh haduh mynta kim shym la urlong kum ka ILP bad ka MRSSA kiba long ki paia bah paia san ban iada ia naka jingwanrung kyrthep ki briew ba nabar.
Ym lah ban len hooid ka ju don ka jingkiew ka jinghiar ha ki dor jong ki mar bam mar dih na ki por sha ki por katkum ka jinglong jingman jong ka mariang hynrei ban shu ai daw ba tang na ka jingbymdon ka rel ka pynlong iaki mar ba kin kiewdor te ia kane hi ka seng kam sngew lah ban pdiang da lei lei ruh, kane ka dei beit tang ban tep eit miaw lane ban iada iaka jingbym lah ban tehlakam iala ka jong ka tnad (Supplies). Ka don ka jingsuba ruh ba ki dei hi ki briew jong ka sorkar kiba pynthut iaka iaid ka ieng ki kali kit mar ba pynlong ban kiewdor ki mar bad ia kane mano ban kitkhlieh? Kylli ka seng.
Ka seng ka phah kane ka kyrwoh sha ki paidbah bad khamtam sha ki paidbah ka East Jaiñtia kaba ka sorkar ka thmu ban wanrah lynti rel ba horkit hordang ym dei ban shah ialam bakla ne shah pynthame ha ki kam buitpoh jong ka sorkar, katkum ka khubor kaba ka seng ka shem ba ki don ki briew jong ka sorkar kiba pyrshang ban ialam bakla ia u paidbah da kaba ong ba lada wan ka rel hangne ha ka thaiñ kin sa bun kiba nabar ban thied iaki mar ki Mata bad kan pynsuk ruh iaka kamai kajih ka jong ki briew, bad ban wanrah ruh iaki marbam mar dih kiba nabar haka dor kaba tad, hynrei dei ban sian bad ban nym shah pynbeij shuh ha kita kiba kam ialade ki briew jong ka sorkar ne ki agency jong ka sorkar.
Ka jylla ka don ia shibun bah ki nongrep kiba rep ia shibun ki mar bam mar dih hynrei ym juh iohi ba ka sorkar kan thaw ki lynti ki lad ban iada ban kyrshan ne ban ai jingmyntoi iaki, bad kane hi ka dawbah ba ka jylla kahap ban shaniah marbam na kiwei pat ki jylla.
Ka seng ka don ka jingsuba kaba jur iaka khubor ba sop sop jong ka sorkar ba kan sa wanrah bun tylli ki kharkhana dew bilat sha kito ki jaka ba thmu shna lynti rel bad lada kane kan jia kaba mut ba ka sorkar kan pynsuk tang ia kito ki kharkhana katba ia ki paidbah kin sa shah thombor biang ha ki nongwei kiba nabar kiban wan tang ban kjit iaka spah mariang. “Shaei ka lawei ki khun ki kti ki jong ngi haba kumta kan jia”? Imat kato ka jingkren jong u myntri ba ka jingbym don iaka rel sa kiew ki mar bam kadei kaba la plan lypa daka sorkar.
Kyntang iawai ka seng ka phah ka khubor kaba shai sha ka sorkar ba kan klet noh shisyndon iaka jingthmu ban wanrah lynti rel ha Jaiñtia hills bad ban wad pat da kiwei ki lad ki lynti ban tehlakam iaka jingkiew dor ki mar bam ym ban pynksan tang haki rynsan ban pynkylla iaka jylla sha kata ka $10 billion economy state haba tang iaki jingeh hapoh jylla ym lah ban saiñdur haka rukom ban pynsuk iaki nongshong shnong khamtam ia u kup shiliang u sem shiliang.