Ka Dr. R. Pohrmen kaba dei ka Superintendent jong ka Jowai Civil Hospital ha ka jingkren kum ka kongsan ha ka sngi ba ai burom ia kito ki nong synniang snam (Blood donors) kala ong ba ym dei tang ba ki ai ia ka snam jong ki na ka bynta ban pyllait ia ki nongpang na ka jingiap hynrei ruh kila long kum ki nuksa na ka bynta kiwei pat ha ka imlang ka sahlang na ka bynta ban ai ia kum kane ka jingshakri sha ki paidbah.
Ka 13 tarik mynta u bnai kaba dei artad ka sngi rakhe jong ka National Voluntary Blood Donors kumta na ka liang jong ka Jowai Blood Bank kala pynlong ia ka prokram kaba lyngkot kaba long shi bynta ban ai burom ia kito ki nongaisnam mon sngewbha (Blood Donors) kiba la ju ai snam na ka por sha ka por.
Ka phang pdeng jong une u snem mynta ka long “Give Blood and Keep the World Beating”. Haba kren ha kane ka sngi ka Dr. Pohrmen kala ai khublei shi katdei eh ia kine ki nongaisnam mon sngewbha kiba la ju synniang ia ka snam jong ki na ka por sha ka por ban ioh pynlang ha kane ka Blood Bank jong ka Hospital. Lyngba kane ka jingsbun bad jingkylluid mynsiem jong kine ki Donor ka pynlong ia kane ka jaka pynlang snam ban biang wat ha ka por ba lynshop jur ka khlam Covid-19.
Ka Dr. Pohrmen kala ong shuh shuh ba ka snam ka long kawei na ki bynta kaba donkam tam ha ka met jong u briew na ka bynta ka jingim, katno eh khamtam ha ka por ba ar met ki long kmie, haba jia kino kino ki jingmynsaw bad kiwei de ki jingjia kiba donkam ban ai snam ia u ne ka nongpang khnang ba kin ioh biang ia ka jingim. Kumta ka khot lang ia baroh ki riew paidbah ban long kiba kloi ban wan shakhmat ban nong synniang lem ia ka snam jong ki, khnang ba yn lah ban iada ia ka jingim briew.
Na ka liang i kong A. Laloo, Assistant Director, VBD MACS ila ai ka jingpyni lyngba ka skrin halor ki jingshakri kiba kane ka Blood Bank kala ai sha ki paidbah.
Ka Dr. P.Shylla, in charge jong ka Jowai Blood Bank ka pyniaid ia ka jingialang bad kala ai ruh ia ki kyntien ai khublei ruh ia baroh ki Donors. Ia ki kyntien ai khublei la ai da ka kong M. Dkhar kaba dei ka Staff Nurse.
