Ka Regional Democratic Alliance (RDA) kaba kynthup ia Seng saiñ-hima United Democratic Party (UDP) bad Hill State People’s Democratic Party (HSPDP) hynne ka sngi ka 09 tarik u Nohprah, 2024 ki la iakynduh biang hadien ka elekshon MP Lok Sabha.
Kane ka jingialang ka long ban iamir jingmut na ka bynta ka elekshon MDC sha Khasi Hills Autonomous District Council bad Jaiñtia Hills Autonomous District Council ka ban long ha u snem ban wan.
Kine ki seng saiñ-hima ki don ka jingïatreilang ha ka RDA ha ka ïing Dorbar Thawain ka Jylla bad ki khmih lynti ba kin ïatreilang ruh na ka bynta ka elekshon MDC ban wan.
Haba kren sha ki lad pathai khubor U Bah Titostarwell Chyne, Assistant Secretary ka RDA u la ong ba ha ka 11 tarik ka jingïalang kan sa mih ka rai la kine ki ar seng kin ïaid iakhun la ka jong ha kane ka elekshon ban wan lane ki lah ban ïakhun paralok da kaba ïarap mar kylliang pat ha ki Constituency bapher bapher.
La khmih lynti ruh ba ha katei ka jingialang ban wan kine ki ar seng kin pynbna ia ki kyrtong jong ki na ka bynta ka elekshon MDC ban wan.