U Symbud Myntri Rangbah ka jylla, u Bah Prestone Tynsong, u la pyntip hapoh ka Ingdorbar, ba ka sorkar kan dang shong bishar bniah ia ka jingdonkam ban ai District la la jong, kata ia ka ban pynwandur na ka East Khasi Hills, ki Civil Sub Division na ka bynta ka Mawsynram bad kiwei ki Community & Rural Development blocks thymmai.
Ha ka kynta jong ka Question Hour, u MLA ka Mawsynram u Bah Ollan Sing Suin u la buh jingkylli da kaba ong ba balei ka Mawsynram la dei ban kyntiew noh sha ka Civil Sub division.
Ha ka jingkylli bynrap, u Bah Charles Pyngrope u MLA ka TMC u la buh ka jingkylli ba hato ka sorkar kan dang pynwandur ia ki District thymmai na ka East Khasi Hills, ha kaba u la pynkynmaw ruh ia ka jingdawa ban ai District ia ka Sohra.
Haba jubab ia kane na ka liang u Symbud Myntri Rangbah u Bah Prestone Tynsong, u la ong ba kine baroh ki jingdawa dang donkam ban shong bishar bniah da ka sorkar, da ka ba kdew ruh ba u long u ba kloi ban thaw thymmai ia ki Districts, Civil Sub-divisions bad ki Blocks.