Na ka bynta ban pynthikna ba baroh ki nongthep vote kin long kiba la nang ban pyndonkam ia ka Electronic Voting Machine (EVM) na ka liang u Deputy Commissioner ka West Jaiñtia Hills District ula pyntip ba ka tnat Election kan sa pynlong ia ki prokram ai jinghikai sha ki paidbah jong ka District baroh shaphang kumno ban tip ban pyndonkam ia ka EVM.
Ia kane ka jinghikai yn pynlong sha baroh ki saw tylli ki Assembly Constituency kiba don hapoh ka West Jaiñtia Hills District ia kaba la sdang lypa naduh ka 13 tarik u Nohphrah, 2023 ter ter.
Ia kane ka jinghikai pynsngewthuh sha ki Polling Station yn pynlong lyngba ki Mobile Demonstration Van (MDV) ha ka jingiadon ryngkat ki BLO Supervisor bad ki nongtrei jong ka tnat Election. La buh ruh ia ka EVM Demonstration Centre (EDC) na ka bynta ki paidbah ha ophis treikam jong u Deputy Commissioner (Election), West Jaintia Hills District, Jowai, kaba la pyntreikam naduh ka 19 tarik u Nohprah 2023. Na ka bynta kino kino kiba kwah ban pyrshang ki lah ban wan mih ha katei ka ophis naduh ka por 10:00 AM haduh 1:00 PM man ki sngi ba long trei.