Hadien ba kut ka jingbuhpor ha kaba ïadei bad ka jingbym shim bai khajna ïa ki kali jong ka thaiñ West Jaiñtia Hills District, mynta ka sngi la pynlong ïa ka jingïalang bala pynlong ha Conference Room jong ka ophis treikam u Deputy Commissioner ka West Jaiñtia Hills District, na ka bynta ban pynbeit ïa ka rukom lum khajna na ki kali ki mator kiba ïaid lyngba ka Toll Gate Ialong/Pasyih.
Ïa kane ka jingialang la khot hapdeng ki nongïalam jong ka seng ki nongñiah kali kamai ka All Jaiñtia Commercial Vehicle Association (AJCVA), ka Jaiñtia Student Movement (JSM), ki nongmihkhmat na ka shnong Ialong bad ki nongtrei ka NHAI. Ïa kane ka jingïalang la pynïaid da u ADC ma M.A Challam.
Ha kane ka jingïalang da kawei ka jingmut kila poi biang sha ka jingïakut ban pynneh shwa kumba ju long ba ki trai kali napoh ka West Jaiñtia Hills District kim hap ban siew khajna haba ïaid lynti lyngba katei ka Toll Gate kaba don ha Ialong/Pasyih, West Jaiñtia Hills.
Kum ban shu pynkynmaw ba ha East Jaiñtia Hills District ruh ka Toll Gate kaba don ha shnong Lumshnong ka dang pynneh hi ïa kane ka juh ka rai bad kata ka long ban ym shim khajna ïa kito ki kali kiba dei trai jong ki nongshong shnong ka thaiñ hi baroh kawei.